La Usc di Ladins

Conzerc da Nadé cun l’Orchestra y le Cor Val Badia
An podará aldí les beles melodies de Corelli y Diabelli, en ocajiun di conzerc dl’Orchestra y dl Cor Val Badia, ai 28.12. a Al Plan y ai 29.12. a Badia
Le tëmp da Nadé é n tëmp dër sintí y che an partësc cun les porsones che nes stá dlungia. Abelí vëgn chësc tëmp dantadöt ince dales beles melodies da Nadé. L’Orchestra Val Badia adöm al Cor dla valada abelësc döes sëres cun n conzert te chël che al vëgn porté dant toc de musiga di componisć Diabelli y Corelli. Le conzert vëgn tigní sot ala bachëta de Bruno Rives y al sará musizisć y ciantarins da döta la valada. Le pröm apuntamënt é en jöbia ai 28 de dezëmber dales 20:30 tla dlijia d’Al Plan y le de do ai 29 de dezëmber dales 20:30 gnará le conzert tigní tla dlijia de Badia.

Spetacul söi schi sön la Gran Risa
La sabeda ai 23 de dezëmber se presentará dötes les scores de schi dl’Alta Badia te n spetacul sön i schi sön la pista Gran Risa a La Ila
La pista Gran Risa, olache al é gnü tigní ti ultims dis les döes gares de Copa dl monn, i fajará ince da cornisc a n spetacul sön i schi de dötes les scores de schi dl’Alta Badia. Les scores de schi á en chësc invern tut la dezijiun da se mëte adöm por presenté na serada d’animaziun. Le spetacul é söl program la sabeda ai 23 de dezëmber dales 17:30 y an podará ti ciaré diretamënter dal raiun dl travert dla Copa dl monn jödapé dla pista. I maestri abelirá le scür dla sëra cun na defilada sön i schi cun i chentli, sciöche ince cun na desmostraziun di liví dl jí cun i schi: dal jí cui schi a cadria cina al jí cui schi paralel y fá la ota »curva Italia«. N spetacul rich de adrenalina y che liëia düc i maestri de schi dl raiun dl’Alta Badia. Düc é dër bel inviá da tó pert ala manifestaziun.

Museum Gherdëina daviert per la sajon da d’inviern
Chëst ann saràl metù ora la cripl dl 1910 de Rudolf Moroder de Lenert y bera Śepl da Jumbierch
Tl Museum Gherdëina tla Cësa di Ladins a Urtijëi iel chëst ann da pudëi amiré la gran cripl cun belau 50 figures di artisć Rudolf Moroder de Lenert y bera Śepl da Jumbierch dl ann 1910.
Da udëi iel mo truepa d’autra figures storiches zipledes tla stues de Gherdëina, coche nce la bela cripl de Vinzenz Peristi, la cripl de Levisc Antone Insam da Cësanueva o la cripl autere de Luis Insam dl Tavela.
Dlongia i pec d’ert pòssen ti cialé a mo truep d’auter jan tres la culezions.
I orares de giaurida dl Mu­seum ie dal merdi al vënderdi, dala 10:00 nchin la 12:30 y dala 14:00 nchin la 18:00.
Danter la festes, n San Stefun, 26 de dezëmber nchin n Santa Guania iel daviert uni di.
Stlut iel mé n Ueia de Nadel, n Nadel, n Silverster y n l Ann Nuef.
L team dl Museum Ve aspieta cun legrëza y Ve mbincia a duc canc de bela Festes y n bon Ann Nuef 2024.

Salüc 2023, bëgngnü 2024
Tl’Alta Badia vëgnel organisé cotan de manifestaziuns por saludé l’ann 2023 y ti dé le bëgngnü al 2024
Tl’Alta Badia mët man les manifestaziuns por saludé l’ann ai 29 de dezëmber: a Calfosch él la Scora de schi adöm ai Stödafüch che organisëia dales 17:00 inant la lotaria cun musiga y dales 18:00 sarál spo le tradizional rait a val cun i chentli, da pert dla scora de schi, abelí da n spetacul de löms laser.
Ince a San Ciascian vëgnel metü a jí da pert dles scores de schi n rait a val cun i chentli, la sabeda ai 30 de dezëmber: pro la pista Armentarola dales 17:00 cun la Scora de schi Dolomites y sön la pista Piz Sorega A dales 18:00 cun la Scora de schi da San Ciascian, a chëra che düc po tó pert, se scrion ite pro la scora de schi. Denanche pié da Piz Sorega jö él la poscibilité da se mangé na jopa cialda.
La medema sëra sarál sön la pista Doninz a La Ila les scores de schi da La Ila y Dolomites che fej n spetacul sön i schi adöm al »Pirates Freestyle Team«, dal titul »The cartoon ski show«, che mët man dales 21:00.
Al 31 de dezëmber podará düc i interessá tó pert al rait a val cun i chentli sön la pista La Crusc, che pëia ia dales 17:45; al ne manciará sambëgn nia musiga cun le DJ y val’ da bëre jödapé dla pista. Por tó pert al rait mësson se scrí ite pro la scora de schi de Badia.
San Salvester sön plaza
La nöt de San Salvester pó gní festejada te plaza sides a San Ciascian che a La Val y ince a Corvara: tl zënter dl paisc da San Ciascian pón tó pert al conzert dl grup »Spremuta«; pro le marcé da Nadé a Corvara sarál DJ MEWU che se crüzia dl intratignimënt musical y ince sön plaza de comun a La Val sarál musiga cun n DJ. Pro dötes trëi les festes vëgnel dé fora val’ da bëre y ares mët man dales 22:30.
Nanü a Corvara
Le paisc da Corvara ti dá spo le bëgngnü al ann nü cun n spetacul al 1. de jená 2024 dales 21:00, sön la pista Col Alto. La Scora de schi da Corvara–Ladinia organisëia n rait a val cun i chentli adöm ales »netores« che jora cun i parapënc tl scür dla sëra, i Carabiniers y i Alpini dla divijiun Tridentina; deperpo gnarál ince iluminé le Sassongher. Le grup »Sissamba« adöm cun DJ Elf se cruziará dl intratignimënt musical tratan la manifestaziun.

Trëi Rëiesc 2024
Nce l ann che vën, plu avisa ai 3 de jené 2024, jirà i Trëi Rëiesc da cësa a cësa
I Trëi Rëiesc ti va do ala stëila che ie l simbol de na gran vijion: n mond zënza fam y patimënt, ulache uniun possa viver, dëni de vester nasciù.  I Trëi Rëiesc jirà da cësa a cësa a purté la benedescion per l ann nuef, l ncëns y a damandé na dunfierta per passa cënt proiec caritatifs che la Schiera Junila sustën sëura dut l mond. N particuler unirà chëst ann sustenì na cësa per ëiles y mutans tla zità Toliara tl Madagascar, che pieta scunanza da viulënza sessuela, servijes saniteres y l mesun de furmazion y mparé n ert. N’autra pert dla dunfierta jirà tla zità Analalava per frabiché na stazion de nfermieria. L spedel plu daujin ala zità ie a 150km y l viac dura passa ot ëura – massa giut te n caje de emergënza.
De gra a uniun che ulerà dé si sustëni.