La Usc di Ladins

Mostra aziendela dla Val dl Isarch 2024
La iscrizions per mëter ora ie daviertes. L ie da se nuté su nchin al plu tert ai 20 de jené
Do l gran suzes dl 2016 cun passa 10.000 vijitadëures, mët la grupa dl LVH/APA dl raion Persenon deberieda cun la lies de categuria HDS, HGV, SBB y la Assoziazion di mprenditëures de Südtirol inò a jì chëst ann la mostra aziendela dla Val dl Isarch. La fiera vën a s’l dé dai 3 nchin ai 5 de mei tl raion dla Obstgenossenschaft Melix a Vahrn.
La fiera à l fin de prejenté la gran variazion dla truepa mprejes dla Val dl’Isarch y ora de chël à i chi che mët ora la puscibltà de lascé udëi si ufiertes economiches, si prudoc y si servijes a n publich local y regiunel y sambën nce a duta l’autra jënt nteresseda. Sce sëis nteressei a fé pea per mëter ora pra la Mostra aziendela dla Val dl Isarch pudëis gën ve lascé nuté sun nchin ai 20 de jené sot a www.lvh.it/brixen24.

Hanna Bachmann & STL
I Jëuni de Mujiga de Gherdëina nvieia a n cunzert mpue autramënter: na cunlaurazion danter mujiga y ert, n mierculdi ai 10 de jené dala 20:00 te Cësa di Cungresc a Urtijëi
Hanna Bachmann, pianista nasciuda tl 1993, à da mustré su bele truepa atività de cunzerc sëura dutaEeuropa. Sëuraprò a si ativiteies da solista se cunzentreiela scialdi sun mujiga da camra y tla cumposizion de cianties.
Christian Holzknecht STL ie - coche trueps bele sà - artist/depenjadëur de Urtijëi.

Deberieda se à i doi artisć metù adum per pité na performance mpue autramënter: leures de STL sarà da pudëi amiré tl foyer dla Cësa di Cungresc y unirà pruietei tla sala ntan l cunzert al tlavier de Hanna Bachmann, che pieterà n prugram scialdi rich de Fanny Mendelssohn Hensel (1805-1847): Das Jahr. 12 Charakterstücke (L ann. Dodesc pec de carater).
Per apasciunei de mujiga y dantaldut de tlavier iel n apuntamënt da no pierder.

Dendënzes tla nfanzia
La sëira de nfurmazion cun l psicologh Dr. Edmund Senoner sarà n juebia ai 11 de jené dala 20:00 tla gran Sala de Chemun de Santa Cristina
L Cunsëi de Furmazion de Santa Cristina n culaburazion cun la Nëus Jëuni Gherdëina, la lies di jëuni de Gherdëina y l Servisc Furmazion de Gherdëina mët a jì na sëira cun referat dal titul: »Sucht beginnt im Kindesalter« cun l psicologh Dr. Edmund Senoner.
La sëira unirà tenida n juebia ai 11 de jené dala 20:00 tla gran Sala de Chemun de Santa Cristina
L referënt traterà la problematica dla dependënzes (danter droghes, social y auter) de situazions de vita defrëntes, di jëuni y dla jëunes ma nce di granc y dla grandes. La ie penseda per jëuni y jëunes, ma nce per genitores.