La Usc di Ladins

Patrik, podesseto n curt te prejentà?
Son Patrik De Michiel e chest an faje 40 agn. Ai semper vivest nta Col. Ai studié economia aziendal al Ski College a Falcade. Son marangon e maestro de schi.

Can asto scomenzé a jì coi schi?
Vegne da na famea de persone che và coi schi e ai semper bù le piste a doi varech da cesa, cussì son peé via con chest sport co ave cuater agn. Ai corest per desferenc schi club ma, man man che cresseve, ai scomenzé a jì coi schi incia con amizi guide alpine e a me arvijinà semper de pi al fora pista. A 23 agn, finì l corso maestri, ai scomenzé a zarcé luoch manco saurii da ie ruà apede, ulà ciatà fora de bele linee de nef ntamez a le crepe per podè vignì ju coi schi de duta oga.

Ci se ntendelo per schi estrem e cala elo la filosofia de chest sport?
Jì coi schi ntei siti pi mpegnatif, darè ester ruai sunsom a na riva con noste giambe; se gode, vive la natura e la fadia senza mai se desmentié de vardà a nosta segu­reza, ajache la mont no perdona. Ogni situazion l’é desferenta: ulache ocor se duora incia la corda, mpò l ideal sarave de vignì ju per na linea coi schi ntei piei da sunsom fin japé. Da spes vardon incia de no vignì ju per la medema strada che on fat a jì nsu. (Ntervista de Milly Crepaz per l Istitut Ladin Cesa de Jan)