La Usc di Ladins

Ai 19 de fauré à l Aiut Alpin Dolo­mites scumencià si servisc dala 06:00, y riesc do àn cherdà l joler per na emergënza sanitera a Corvara: purtruep à l dutor mé plu pudù cunstaté la mort dl ël.
Daldò iesen unii mandei dala zentrela sun Secëda per n pazient cun n trauma al cë, che n à ciarià y menà tl spedel de Persenon.
L ie pona stat mo n ntervënt per n nzidënt sun l lëur te n bosch sëura Rina: n ël fova ncastrà sot a n lën, y ajache l fova te n gran ërton, l àn trat su cun na binda y menà cun l joler tl spedel de Bulsan.
L ultimo ntervënt dl di tla valedes ladines ie stat sun i purtoies de Col Margerita via n Fascia, ulache n mut se à taià cun l tai di schi. N ie julei limpea tl spedel de Belun.
Ai 20 de fauré iel stat doi ntervënc sun purtoies: l prim tl raion dl Boé ulache un dai schi fova tumà se rumpian l os dla tibia, l segondo sun l purtoi de Pralongià ulache n ël se ova giapà na scasseda al cë. Tramedoi àn menà cun l joler tl spedel de Burnech.
Ai 21 de fauré ie l prim ntervënt stat abenëura daduman. A Urtijëi ne stajova n ël dl luech nia bën–l ova de bujën de unì menà cun l joler tl spedel de Bulsan.
L segondo ntervënt ie stat sun Mont de Sëuc sal »Goldknopf«, ulache n laurant ova problems a tré l fla. Do la prima cures iesen julei limpea tl spedel de Persenon.
Ruvei de reviers tla basa a Puntives àn riesc cherdà l joler per l proscimo ntervënt: pra la stazion de prim aiut sat Kompatsch fòvel n’ëila che fova tumeda cun i schi batan dassën l cë. N à stabilisà la pazienta, la à ciarieda tl joler y meneda tl spedel de Bulsan.
Da iló à la zentrela cherdà l joler per n ntervënt tl Edelweißtal a Colfosch, ulache n jëunn ova batù l cë tl snowpark y messova unì menà te spedel per vel’ vijita sëuraprò.

De plu tla edizion stampeda de La Usc di Ladins o sun l e-paper a paiament www.lausc.it/e-paper