La Usc di Ladins

Ogne an l FAI (Fondo per l’Ambiente Italiano) endreza tant d’aisciuda che d’uton i dis dediché a valorisèr l patrimonie de ambient, èrt e cultura sun dut l teritorie nazionèl. L é semper na ocajion emportanta ence te noscia valèdes, olache de gra al empegn di volontères del Grop FAI de Fascia e Fiem se pel aer l’ocajion per descorir n patrimonie prezious, che aon enlongia ju ma che amò no cognoscion. 

Chest’aisciuda la proponeta che la delegazion de noscia valèdes ne met dant per chest fin de setemèna di 23 e 24 de mèrz l é chela de cognoscer desvaliva realtèdes del paisc de Tieser e di lesc entornvia. Chiò defat la tradizion, l’èrt, l artejanat e la musega à na longia storia.

En sabeda ai 23, se l temp l é bon, pean via da les 9:30 dal piaz Cesare Battisti i partezipanc i podarà fèr na raida fin a Stava, te n percors de èga, tera e ciel. Se podarà veder l projet »Dove Stava una valle« che moscia la storia e l’ativitèdes de chest lech olache ai 19 de messèl del 1985 dut é stat dessatà. 

Domesdì se jirà inant per la »Via dei Pianeti« fin al Osservatorie Astronomich de Zanon, olache se podarà vardèr la marevees del ciel tel Planetarie. 

La domenia, pean via semper da les 9:30 da doman dal Piaz Cesare Battisti, sarà enveze dedichèda a la vijita del paisc.

De più su La Usc stampèda de en vender ai 22 de mèrz.  (LG)