La Usc di Ladins

Via per chesta ultima setemènes, doi Museghes de noscia Val à chiamà ite sia Radunanza anuèla per renovèr diretives e encèries. Te la Musega Auta Fascia Daniela Favè à lascià sie post a Francesco Mazzel, enveze Mathias Pezzei a cef da na dejina de egn de la Musega de Poza l va inant.
Con la Radunanza de en jebia ai 14 de mèrz se à serà su l percors de Daniela Favè da presidenta de la Musega Auta Fascia. Te si 9 egn de mandat, la formazion bandistica à portà inant projec e resultac de valuta. A sie post se à metù a la leta e l é stat lità desche nef president Francesco Mazzel, bandierèl e prejentador de la musega, e stat te anter i fondatores.

Jir inant tel segn de la continuità l é stat enveze chel che à cernù la Musega de Poza. L ultim mandat l é stat slongià de n an, da trei a cater egn, acioche i apuntaments e i projec che l era stat envià via per festejèr l 90° cedean da la fondazion vegne porté a piz.
En lunesc ai 26 de firé l é stat ampò la litazions de la neva direzion e dapodò l é jà stat ence la pruma scontrèda de diretif, lo che l é stat spartì la encèries. President e vizepresident resta Mathias Pezzei e Thomas Battisti.

De più su La Usc stampèda de en vender ai 22 de mèrz.  (Nicoletta Riz)