La Usc di Ladins

Pelei i mic de la Grecia veiora doventèr conties bones de encantèr bec picoi, jà dai cater egn en su? Ben segur! Da egn, ence travers scomenzadives desche »Nasciui per lejer« aon emparà che no l é mai massa prest per meter i picioi a contat con la parola scrita, ben segur travers la ousc de zachei che pel ge lejer su. Oramai la conties enventèdes o tramanèdes a ousc, desche dut l sistem de la tradizion orala, se à desfantà, ma resta l valor emportant de ge lejer o contèr conties ai bec fin da canche i é tant picoi che se peissa che no i posse capir nia, adertura da inant che i nasce, ajache l son de la paroles, contèdes con saer e amor, ge restarà daite e l darà sie fruc.

De chest la é ben segur en consaputa ence Enrica Ricciardi, che la é da Pèdua e la é stata dozenta de letres te desvalives livie de scola. Ricciardi la é esperta de letradura per bec e la é stata ence consulenta del Minister per la indicazions su la revijion di programes per la scolina e la populèra e l’à colaborà a desvalives projec te la Scola Ladina de Fascia.

Enrica Ricciardi l’à scrit desvalives libres educatives e gustegoi per bec e tosec, desche »L’Ape Maia. Difendi la natura. Scopri il mondo delle api e proteggi il Pianeta«, o amò »Le più belle fiabe di Andersen«, »Le più belle favole degli animali« e etres.

Te chest meis, prejentèda da la ex Sorastanta e ades Conseiera de procura al sozièl Mirella Florian, Enrica Ricciardi la é stata protagonista de trei scontrèdes, te la trei biblioteches de Moena, Cianacei e Sèn Jan, olache l’à portà dant sie ultim projet, leà al liber che ela enstessa à scrit e che l à per titol »Le sei storie dei miti greci«.

De più su La Usc stampèda de en vender ai 22 de mèrz.

 (Lucia Gross)