La Usc di Ladins

Cuartet d’archëc
Düc é dër bel inviá al teater da rí »Cuartet d’archëc« (Das Streichquartett) de Szöke Szakall sot ala rejia de Anna Palfrader, cun la traduziun tl ladin de Matteo Rubatscher
L’Uniun Teater de Badia s’la conforta da ves presenté chësc toch da rí y ves inviëia a öna dles 5 rapresentaziuns tl salf dla Ciasa Jan Batista Runcher a San Linert: la premiera é en doman sabeda ai 20 d’aurí dales 20:00. Les atres rapresentaziuns é: domënia ai 21.04. dales 17:00, mercui ai 24.04. dales 20:00, sabeda ai 27.04. dales 20:00, domënia ai 28.04. dales 17:00. Les prenotaziuns vëgn tutes sö al 328 0984630, danter les 18:30 y les 22:00.
Al jobelnëia por os Carlo Bernardi, Nadine Dapoz, Gabriel De Giovanni, Magdalena Lerchegger, Gustav Mangutsch, Giuvani Pitscheider, Daniel Rubatscher, Anna Tavella, Daniela Valentin.


Cëna cun teater criminal
A Corvara vëgnel indô pité ai 11 de ma la cëna cun teater, olache le publich é invié da stomé para
Le Consëi de formaziun dl Comun de Corvara mët a jí en sabeda 11 de ma dales 19:30 tl salf dles manife­staziuns a Corvara na cëna cun n teater criminal, olache le publich é invié da stomé chi che é l’assas­sin dla storia, che sará da odëi sön paladina tratan cëna.
Al jobelnëia Lucia Cirella, Marco Moscon, Andreas Pec­cei, Tobias Stampfer y Susann Tavella. La rejia é de Erika Castlunger. Por in­for­ma­ziuns y prenotaziuns él da cherdé sö Sonia al 349 1588485.


Pastelné decurazions cun de vedli libri
N ucajion dl di dl liber nvieia l Istitut Ladin Micurá de Rü y la biblioteca O. von Wolkenstein de Sëlva de cuer a na sëira de pastelné decurazions cun libri vedli (Orimoto)
L curs ie debant, l ie adatà a duc, dai 9 ai 99 ani y l vën tenì n merdi ai 23 de auril dala 20:00 tla biblioteca O. v. Wol­ken­stein de Sëlva, cun la referënta Erika Pitscheider.
Davia che i posć ie limitei prions bel de se nuté su te biblioteca al numer 0471/772181 o te Istitut al numer 0471/794268.
Da tò pea iel n lineal almanco 20 zentimetri lonch. I libri vën metui a despusizion.


Curs de fotografia d’oget
L’uniun EPL–Ert por i Ladins inviëia al curs che gnará tigní da »silbersalz.photo«
Deplü é i cursc de teoria y pratica che l’uniun EPL s’á tut dant por chësta sajun y chësc ann. Le program pëia ia cun le curs »Oget« che é n workshop cun le tema zentral dla fotografia d’oget tla teoria y pratica, tigní dal coletif de fotografs »silbersalz.photo« de Puster.Le curs vëgn tigní ai 29 d’aurí dales 14:00 ales 21:00, y ai 4 de ma dales 9:00 ales 14:00. Le prisc é de 70,00 Euro (50,00 Euro por i mëmbri dl’EPL).
Le curs vëgn desfiré tl atelier dl artist fotografich Georg Erlacher, str. Gran Pre 15 a Al Plan de Mareo, prenotaziuns y informa­ziuns pro Irina Tavella al numer telefonich 339 855 7964.


Alenamënc de sauté
L’ASV Gherdëina Runners mët a jì alenamënc de sauté cun Diego
Es’a pensà de scumencé a sauté?
Ues’a fé pea na mesa maratona, na maratona o d’autra garejedes de sauté y ne ses nia co te anjenië ca? L ASV Gherdëina Runners pieta alenamënc propi de chësc viers: vie a fé pert dla grupa y a te alené uni merdi dala 19:15 sun l ciamp dal sport Mulin da Coi a S. Cristina.
Per nfurmazions: info@gherdeinarunners.it