La Usc di Ladins

Coi 20 de mèrz l é tacà ite, aldò del calandèr, l’aisciuda. Coscita per zelebrèr chest moment de renasciment de la natura che se lea a la revitalisazion del spirit ladin, taca ite chisc dis ence l’Aisciuda Ladina. La Consulta Ladina à fat fora che chest an i apuntamenc no sarà più conzentré te la pruma setemèna de mé, ma i vegnarà slarié fora via per i meisc de oril e mé con desvalives apuntamenc sun duta la val. A chesta vida podarà tor pèrt più jent da duc i paijes de Fascia.

L argoment de chesta neva edizion l é la toponomastica, i inomes de lech, e aldò de chest tem sarà ence la scomenzadives che é states metudes sul calandèr dai enc touc ite tel endrez: l Comun General de Fascia, l Istitut Cultural Ladin Majon di Fascegn, l’Union di Ladins e la Scola Ladina, che se dèsc ju acioche duc posse cognoscer e durèr i inomes ladins di lesc de Fascia e percheche no vae perdù l leam col teritorie.

L prum apuntament l é stat en vender ai 22 de mèrz col cors per emparèr a depenjer e entenjer i eves da Pèsca de l’Union di Ladins e con la seconda setemèna de oril se jirà ite tel vif de chesta festa del lengaz e de l’identità dal titol »Gé ve voi ben… inomes de mia tera«.

En mèrtesc ai 9 de oril da mesa les nef da sera te sala grana del Comun General vegn avert ofizialmenter l’Aisciuda Ladina 2024 con i saluc e i intervenc de l’autoritèdes e di enc organisadores e la partezipazion del Coro Nosc de Soraga. L dì do, ai 10 de oril da mesa les nef da sera te sala del Consei de Comun de Sèn Jan l é na scontrèda culturèla col storich Cesare Bernard e l menatroes Damiano Lorenz sun »Col de sela, Ciaslir e Col de mé: la reijes de nosc popul anter storia e lejendes«. Chisc medemi lesc se podarà i veder dapò en ocajion de la raida sul teritorie che vegnarà endrezà en sabeda ai 13 de oril inantmesdì, semper con Cesare Bernard e Damiano Lorenz che i compagnarà la jent a pe sa Sènt’Ugèna, Col de sela, a veder la fontèna de l’èga de Sèn Vit e Pontac. Chi che vel tor pèrt cogn esser da mesa les 10 da doman lo da Ciasa Marmolada a Vich.

Per ge stèr do a duc i apuntamenc de l’Aisciuda Ladina 2024 bèsta jir sul sito www.aisciudaladina.it

L é en program na lingia de apuntamenc de gran enteres: escurscions e raides, conzerc e laboratories, prejentazions de libres e scontrèdes culturèles, per viver e slarièr fora la neva Aisciuda Ladina.

 (MCI)