La Usc di Ladins

L’aisciuda fioresc con n grum de apuntamenc per l’Union di Ladins de Fascia. Prum de dut na bela neva: chis dis la sociazion se à tramudà te sia senta storica, la Ciasa de la Moniaria a Sèn Jan, apede la Calonia. Tel prum partiment à troà lèrga i neves ofizies de l’Union di Ladins e de la redazion de La Usc de Fascia. Ve speton, vegnì a ne troèr.

Ai 12 de oril: prejentazion del liber de Luciana Palla
Tel chèder di apuntamenc de l’Aisciuda Ladina, che vegn endrezèda dal Comun General de Fascia adum con l Istitut Cultural Ladin, l’Union di Ladins e la Scola de Fascia, l é sul calandèr chisc dis che vegn trei scomenzadives de la sociazion.
En vender ai 12 de oril da les 5 domesdì te sala grana de la Majon di Fascegn vegn prejentà "I ladini fra tedeschi e italiani. Una comunità di confine: Livinallongo del Col di Lana/Fodom 1918-2023" de la scritora fodoma Luciana Palla, dat fora da Cierre Edizion adum col Istitut Cultural Ladin “Cesa de Jan” del 2023, giusta 100 egn do la spartijon aministrativa di Ladins te 3 Provinzies e 2 Regions desferentes.

 Ai 14 de oril: Festival di Cores »Cianta con nos«
En domenia ai 14 de oril l é enveze n apuntament rich de musega e de bec. Da les 14:30 te Chino Marmolèda a Cianacei, l’Union Generela di Ladins dla Dolomites met a jir la 19^ edizion del Festival di Cores de tosac »Cianta con nos«, con cores da duta la Ladinia e n ghest spezial, l Pice Cor Natissa de Aquileia tel Friul, che tolarà pèrt ence a la messa ladina ciantèda che vegn ofizièda da don Mario Bravin te gejia del Sacro Cher da les 10:30.

De più su La Usc stampèda de en vender ai 12 de oril. 


 (MCI)