La Usc di Ladins

L é stat n domesdì dalbon pien, en domenia ai 14 de oril tel Chino de Cianacei. Pien de tosac, de cianties, de notes, de ladin, de colores, de jent, de legreza, de rengraziamenc e de sodesfazion.

La edizion numer 19 del Festival di Cors di mutons dla Ladinia »Cianta con nos«, endrezèda da l’Union Generela di Ladins dla Dolomites ensema con l’Union di Ladins de Fascia, la é stata dassen garatèda, fosc la più garatèda, à dit l maester del Cor di Mutons de Selva Pauli Senoner, che te beleche 40 egn l à tout pèrt a duta la edizions.

Duc à fat sie miec: ciantarins e ciantarines, maestres e sonadores, tecnics e organisadores.

Su la paladina, dedant a n publich che empienia ogne piz de la sala, la oujes de 150 tosac se à enterzà con la feruscola prejentazion di joegn Mattia Valentini e Daniele Chiocchetti e con la esibizions co la monoroda, con la clavetes e con la balotes di jogolieres de Circensema, che à lascià a bocia averta no demò i bec. Anterite demò vèlch salut »ma curt ve!«, à sotrissà i prejentadores: al scomenz l benvegnù de la presidenta de l’Union Generela di Ladins Milva Mussner e de Doris Fosco, assessora a la cultura del Comun de Cianacei, che à metù a la leta l chino e a la fin l moment de rengraziamenc e di dons.

Podede lejer dut, con la prejentazion di desvalives cores e ence n muie de bela fotografies, su La Usc stampèda de en vender ai 19 de oril.  (Lucia Gross)