La Usc di Ladins

I numeres che met dant tel bilanz 2023 la sociazion donatores volontères de sanch e plasma de la valèdes de la Veisc ADVSP i é dalbon da marevea: 1859 donatores (1222 ic e 637 eles, 540 i donatores fascegn, 135 i neves); 2316 donazions de sanch entriech (2275 del 2022, 2129 del 2021, 1848 del 2020 e 2142 del 2019) con apede 2 donazions de plasmaferesi e 91 sanlasc. La donazions de sanch les vegn toutes su te la doi sentes de Ciavaleis (72 regoetes) e de Sèn Jan (9 regoetes).

Chesta donazions les raprejenta na fieta emportanta de la donazions a livel provinzièl e les deida a na vida determinanta a aer l’indipendenza ematica de noscia provinzia, adertura n vegn dat ence per i ospedèi de autra regions.

L é chisc i dac che é stac prejenté en ocajion de la radunanza di raprejentanc di 20 gropes de donatores de la valèdes de Fascia e Fiem che é stata chiamèda ite en sabeda ai 13 de oril te La Gran Ciasa a Soraga. Te sia relazion l president Clerio Bertoluzza à rejonà de la situazion de la sociazion. »Podon esser contenc del resultat arjont – l à dit – de gra al gran empegn di volontères e de si capigrop. Desche diretif se n aon adat che l temp che se cogn ge dedichèr ai aspec de carater burocratich e finanziarie l é semper maor, temp che cognon ge tor a chel dedicà ai aspec sozièi. Enceben chest cerion de mantegnir vives i contac e la colaborazion con l’autra sociazions e con l’atività de promozion te la scoles de la doi valèdes per la sensibilisazion di studenc.«

De più su La Usc stampèda de en vender ai 19 de oril.  (Monica Cigolla)