La Usc di Ladins

Da vèlch meis en ca l Comun General de Fascia à metù su l Desch per la dependenzes, per rejonèr de chest tem delicat che l era vegnù al luster dal Pian Sozièl de Comunità soscedan cruzie te la istituzions e te la comunanza de val e che revèrda soraldut l consum de alcol e de droghes da man di joegn e ence di manco joegn.

Ai 19 de mèrz l é stat metù a jir na scontrèda olache l é entervegnù desvalives esperc. 

L psicologh Salvatore Massaro à portà dant l projet de sostegn psicologich per i joegn fin ai 24 egn e sia families endrezà da l’Azienda provinzièla per i servijes sanitères, en particolèr per la situazions de maldoranza de sostanzes psicoatives e de dejèje di joegn.

Per se rejonèr sun chisc temes anter la comunanza, ti meisc de oril e mé l Servije sozio-assistenzièl del CGF à metù a jir ence 4 scontrèdes avertes a duc. En vender ai 19 de oril da les 20.30 te Comun General a Sèn Jan la psicologa Francesca Manfredi à rejonà de »Fies senestres e genitores no perfec«. La medema esperta jirà ite amò sun chisc temes ence te na scontrèda online en mèrtesc ai 23 de oril. L é da se scriver ite per ciapèr l link de coleament.

No l é da desmentièr dapò la scomenzadiva del chino sozièl, jà peà via a Cianacei con bon ejit e che jirà inant ai 24 e ai 30 de oril con »Killers of the flower moon« e »Un colpo di fortuna«.

De più su La Usc stampèda de en vender ai 19 de oril. 


 (LG)