La Usc di Ladins

Na gran vëia da jí cui schi: chësc é le pröm pinsier che m’é tomé ite, canche i á odü la gran meja de jënt che rabî tl raiun de Plan de Corones tla fin dl’edema passada. Iló á ai 30 de novëmber ofizialmënter metü man la sajun dai schi. Na sajun che é piada ia "col botto", dijess le talian. Pormó tla nöt dai 11 ai 12 de novëmber ésera garatada da taché ite indortöra i canuns dala nëi, che á messü spodé da zero, sön na contrada ciamó daldöt tarëna. Bele ai 23 â daurí na pröma pista te Ampëz y por la fin dl’edema passada án albü daurí 4 implanc y 5 km de pistes.
Cun na infrastrotöra al vare cun i tëmps y sambëgn cun la grazia dles temperatöres frëides che á pormetü da spodé cotan, ésera ince sön Plan de Corones jüda da daurí por tëmp na bela cerna de pistes, plü avisa 20 implanc por 80 km de pistes. Dala pert d’Al Plan ê düc i coliamënc daverc, da Plan de Corones cina jö dla Miara, y ince i Bornec y i Valdaores ti é stá manëcia da arjigné la pista cina jödapé. Le rest á fat dui de beliscimi dis cun cil bel bröm y sorëdl, tan che les plazes da parché ê bele da doman feter plënes y da misdé laurâ ince i restoranc aslöm.  (pablo)