La Usc di Ladins

La mostra che la Lia dl Turism à metù a jì tla Cësa di Cungresc a Urtijëi, per festejé l di dl’ëila ai 8 de merz, uel vester mpue sciche na stua, ulache l’ëiles artejanes posse se ancunté. Ma nia mé. L ie na stua ulache duc ie nviei a jì ite y a ti cialé a cie che l’ëiles de Gherdëina sà da fé. »L’ëiles à datrai festide a se mustré, perchël iel mpurtant che les possa te chësta ucajion se lascé udëi y mustré cie che les fej. On debujën te duc i ciamps de na raprejentanza valiva di ëi y dl’ëiles«, à dit l ambolt de Urtijëi Tobia Moroder n ucajion dla giaurida dla mostra, che ie stata n sada ai prim de merz.

Bea Insam, la diretëura dla Lia dl Turism, à cuntà coche la mostra ie unida a s’l dé: »Tl mëns de merz ons pensà de fé na mostra dedicheda al’ëiles y ti pité na paladina ulache les possa se prejenté. Sce n ie de n valgunes, pona se féjen plu saurì a mëter ora chël i pec. Purtruep ne n’àns nia lerch per dutes: l ne n fossa mo truepes d’autres te Gherdëina«.

Elisabeth Kostner

L articul tla edizion atuela de La Usc di Ladins.