La Usc di Ladins

N juebia ai 5 de dezëmber iel sun Piz Sela stat doi garejedes nternaziuneles de gigant, che valova per la tlassifica Fis per la categuries aspiranc (nasciui tl 2007 y 2008) y iunior (nasciui danter l 2004 y 2006). De ndut 230 atlec y atletes – 130 mutons y 100 mutans – da deplù de diesc nazions à fat pea, cumbatan dassënn per se davanië ponc Fis. "La garejeda ons propi metù a jì chëst ann al scumenciamënt dla sajon, acioche nosc atlec de Gherdëina y Südtirol posse bele śën fé pea na garejeda Fis y se davanië nsci i ponc che ti dà la puscibltà de pië via plu dancà tla proscima garejedes", à spiegà Karl Heinz Goller, respunsabl dla sezion schi alpin dl Schi Club Gherdëina.

Tla tlassifica generela dl'ëiles iel unit a s'l dé n podest dut talian. La jëuna de Ciastel Anna Trocker, che va a scola a Urtijëi tla ITE Raetia, à venciù la garejeda. La ie stata de 0.76 secunc plu asvelta de Arianna Putzer, la jëuna de Sëlva dl Schi Club Gherdëina che ie ruveda segonda. Terza ie ruveda Gaia Viel dl SC Druscie de Cortina.

Elisabeth Kostner