La Usc di Ladins

N an rich de novitèdes e scomenzadives l é do a se serèr su ence chest an per l’Union di Ladins de Fascia.
La pruma l é che da de oril la sociazion se à tramudà te Ciasa de la Moniaria a Sèn Jan, tanche restaurèda, olache à troà lèrga ence la redazion de Fascia de ‘La Usc di Ladins’.
Per chel che vèrda la publicazions, chest an aon dat fora Ciantons, rencurà da Nicoletta Riz, e Paroles fora de crigna de nosc conseier Fabio Chiocchetti, che col liber del an passà Letres da Larcioné apontin chisc dis l à vent l pest nazionèl de linguistica ‘Tullio De Mauro’.  Amò l é stat endrezà desvalives corsc: i ultimes, Depenjer a la fascèna tegnù dal president Fernando Brunel e Conscric per se enjignèr ciapel e l gramièl tegnù da noscia colaboradora Letizia Soldà, i à abù dassen bon ejit.
Chest l é giusta na cercia… per n saer de più, ence su chel che l é per strèda per l 2025, ve envion duc a vegnir a la Radunanza di sozi, che sarà en vender ai 13 de dezember da les 5 domesdì te Ciasa de la Moniaria.

Tel cors de la scontrèda vegnarà ence prejentà l nef numer de la revista GANA, e a la fin sarà n picol aperitif per serèr su en legreza con n bel moment convivial. Ve envion duc de cher a tor pèrt.