La Usc di Ladins

N’autra gran manconia à tocià l paisc de Pera e la comunanza de duta Fascia, soraldut chela part più ascorta a la solidarietà. Demò 10 dis do la departida de Claudio Gabrielli de Pavarin, en sabeda ai 7 de dezember, a l’età de 78 egn, à lascià de colp chesta tera Floriano Bernard de Cechinol. 

Nasciù del 1946, Floriano l era jit a Trent joenet per i studies te seminarie, e su la sava per doventar preve l à lascià e mudà strada, ti egn entorn l 1968 che anter i joegn ciapaa pe i movimenc de revendicazion e partezipazion politica di joegn.

N enteres, chel envers la politica e l’atenzion al sozial e ai manco fortuné, che à dapò caraterisà duta soa vita.

Enciasà a Trent, pur seghitan a vegnir de spes te Fascia, ajache l é semper restà leà a sia tera e sia mont, Floriano Bernard l é stat per n muie de egn sindacalist e l à tras lurà con jent che aea de besegn, te la Coprativa soziala Villa S. Ignazio e dapò te la Coprativa soziala Le Coste, ence con enciarie de responsabilità. Do che l é jit en penscion l é stat ence conseier de la FAP, la Federazion Anziani e Pensionati de le Acli.

De spes l manaa soe letre ai sfoes regionai e a La Usc, per tor posizion forte su situazion che no ge saea giuste, e semper l se recordaa de le persone con n messaje de augures.

Vegnù de retorn te Fascia a na vida più stabola, l é stat n protagonist de la vita soziala e politica de la comunanza. Del 2010 l à metù su la Banca del Temp, per cerir de portar te val na proponeta che aea abù ejit te autres raions, chela de meter a la leta ogneun soe competenze, baratan debant mingol temp per didar i autres e far comunanza. L’atività de la Banca del Temp era jita inant per valch an, ma no l aea abù te Fascia l gran ejit che l era stat arjont te autre val, e coscita pian pian la era stata mingol arbandonada.

Te chi egn Floriano se à metù a la leta ence per dar so contribut a la politica te val. L se à scrit ite a l’Union Autonomista Ladina e de la UAL del 2012 l é stat ence vizepresident, vardan semper de portar inant ence te chest moviment l’atenzion al sozial, con chel spirit critich che lo caraterisaa e che no semper l era azetà bolintiera.

Del 2016 l à vedù che ence te la rica Fascia no duc stajea ben, e l se à dat ju per crear ence te noscia val l sistem de regoeta e distribuzion de magnadiva per chi che à de besegn, che l era atif te la provinzia col inom Trentino Solidale e l ruaa fin a Moena. L é nasciù coscita Fassa Solidale. Bernard l aea prejentà la preziousa atività del grop de volontares de chesta sociazion, tant per didar chi che te val passa momenc senestres che per smendrar l sfrelaus de magnadiva, te la Cena pureta del Grop Freinademetz da careisema del 2019: na atività che endana l Covid é doventada amò più emportanta e che Floriano à seghità a portar inant, fosc ence a descapit de sia medema sanità.

En lunesc ai 9 de dezember la Comunanza se à strent te gejia de Pera apede a la femena Amelia, a la sor Carla, le cugnade, i cugné, i nevoes e duc chi de ciasa, per ge dir amò na uta devalpai a na persona che à semper vardà de meter l ben de la comunanza dedant a si enteresc personai.  (Lucia Gross)