La Usc di Ladins

Tratan l’ultima edema á nosc cor jonil Kyrios presenté trëi conzerc tles dlijies da San Martin, Bornech y de Badia te na forma n pü’ particolara, che á atoché i cörs dl publich. Bele dan da passa n ann ti á Julia Frenademez, dirighënta dl cor, fat la proposta al comité da mëte a jí na ligna de conzerc te dlijia, olache an ess porté dant la maiu pert di toc a cappella, toc che la dirighënta â descurí tl repertore dl cor. Julia nes á atira ince metü sön mësa che por ajunje le travert preodü, jôra debojëgn de n gran laur de preparaziun, che podô ester impegnatif y sfadius. Porimpó é chësta proposta gnüda tuta sö cun gran entusiam y bona orenté.

Les dlijies da San Martin, Bornech y Badia s’á bele adora implí de jënt. Do les parores de salüt da pert di rapresentanc dles cöres – Romy Crazzolara a San Martin y siur Degan Iaco Willeit a Badia – y l’introduziun al conzert da pert dl cor, á i ciantarins y les ciantarines fat so ingres te dlijia, daimpröma scöra, portan dant la ciantia "Prayer of the children". Le conzert é jü inant cun "The Seal Lullaby" de Eric Whitacre. Cun sües melodies y armonies sintides y les usc fines é le cor sté bun da porté le publich a n’atmosfera de calma, de chëra che i se desmentiun gonot te nosta vita frenetica da vigni de. Ritm y sbunf á spo porté ite i toc africans/swahili Nda Wana, Baba Yetu y Umahlalela. (Stefanie Burchia)

Deplü sön le conzert, sön la idea y le conzet che stá doía ciafëise t’La Usc di 2 d’agost.