La Usc di Ladins

Les veres dl monn é n capitul dër scür tla storia dl’umanité, olache ince de nüsc omi y jogn á messü jí sot y cotanc n’é baldi nia plü gnüs zoruch. Cis la pröma vera é stada por nos dër daimpró, cun aciampamënc di soldas ince te nüsc paisc y le frunt "sön porta de ciasa". Danter les tröpes documentaziuns sön le conflit mondial, n’él gnü a löm dan val’ agn öna scialdi particolara: i diari de Isaak A. Barasch, nasciü dl 1885 tla Galizia (incö Ucraina) y che á sorví tla pröma vera sciöche dotur pro l’armada dl Impêr Austroungarich. Do che chisc diari é stá por feter n secul te na cassëta di USA, ési spo gnüs descuris dala jornalista israeliana Shulamit Kopf da Tel Aviv, che i á dá fora tl liber inglesc "The Mountain War – A doctor’s diary of the Italian Campaign 1914 - 1918". Chësc liber é gnü presenté l’ann passé de jügn ince a Al Plan de Mareo, plü avisa danter i mürs storics dl Hotel Monte Sella, olache le dotur Barasch â sojorné por val’ mëisc l’ann 1916, canche la ciasa ê ciamó residënza di ofiziers. Iló ál ince scrit sö impresciuns dër interessantes sön le paisc, la contrada y süa jënt. 
Le liber é sëgn ince gnü fora por talian, publiché sot al titul "Diario di guerra sul fronte dell’Isonzo 1916-1918". La publicaziun é curada dal storich de vera Erwin A. Schmidl da Viena, cun traduziun de Rossana Macuz Varrocchi.

Deplü ciafëise t’La Usc di Ladins di 16 de forá  (pablo)