La Usc di Ladins

De crisa degun fostü, altamo sce i baiun dl setur turistich tla Val Badia. L’economia florësc, i eserzizi laora. L’ann 2023 mostra indô n iade sö n record tla storia turistica de nosta valada: daimpró da 700 mile ghesć y passa 3,3 miliuns de pernotamënc. Chëstes é altamo les zifres che nes vëgn comunicades dales cooperatives turistiches Alta Badia y Al Plan/San Martin, y che se referësc no ales sajuns, mo al ann solar, dal 1. de jená cina al 31 de dezëmber dl ann passé. Sciöche i fajun bele da cotan d’agn, orunse ince en chësc iade ti ciaré n pü’ plü avisa, comun por comun. Damperfora dijunse che chersciü é le turism tan co indlunch, tla bassa plü co tl’alta valada, ti pici comuns deplü co ti »tëmpli turistics« de Badia, Corvara y Al Plan – ci che é ince cossa natu­rala, él pö bele iló gnü arjunt n limo dër alt. N svilup che dá al edl: le ghest talian é tres chël prinzipal, mo pësa tres demanco y i marciá dl ost sbürla tres deplü.

T’La Usc di Ladins di 23 de forá podëise lí do les zifres plü avisa y ince valgünes coriosités.  (pablo)