La Usc di Ladins

I sun Sabrina, da passa 20 agn insëgni da nodé y i sun alenadëssa pro le SSV Porsenú – seziun nodé y seziun dejabli. I sun referënta dla FISDIR (Federazione Italiana Sport per Disabilità Intellettivo Relazionali) y da dui agn incá laori da colaboradëssa por l’integraziun tles Scores Altes da La Ila.
I á fat fadia da me ausé ite da lauré te scora, i ê massa ausada da ester lëdia da me organisé, da lauré cun mi tëmps y cun i tëmps di mituns y mitans cun debojëgns particolars – tl ciamp sportif.
Te scora él sambëgn atramënter, i minâ che al messas jí döt plü debota y chësc ê n pëis (val’ iade él ciamó insciö).
Al n’é sigü nia saurí da lauré cun porsones cun debojëgns particolars, che al sides dejabilités inteletives o fisiches. An mëss avëi tröpa paziënza, an mëss ester flessibli y impó ester n punt chit.
An mëss avëi coraje da porvé, mo an mëss dantadöt avëi la orenté da conësce la porsona che t’as dan da te y sce t’es empatica aste les portes davertes y te pos arjunje de döt. Tan gonot che al m’é gnü dit: "al n’é nia bun, ara n’é nia bona", ince da familiars y deperpo él gnü arjunt tëmps o limic nia da crëie. Ci sodesfaziuns!
Ci che me tol plü docá, é da odëi co che ai s’impegnëia, co che ai se proa por rové al obietif y la ligrëza te sü edli canche ai ti é stá bogn da arjunje valch, sides tl sport co ince a scora.
Ci che i orëss dí: Azeté la desfarënzia!
Azeté la desfarënzia te dëida capí. Chëstes porsones trasmët dër tröp, ares baia cun i edli, ares mostra só "ester" cun le ciaré – sce an ne les conësc nia, ne les capëscion nia.
Y cun chësc röii: Ciareme ti edli, ciareme cun tü edli – no cun chi che vëiga ma mia dejabilité, te odaras n ater monn!