La Usc di Ladins

Le liber "Sciöch’i sun vái bun", dé fora dala Uniun Ladins Val Badia, é nasciü por i mituns y les mitans dla scora mesana o por chi che se arjigna ca a chësta scora. Chësc liber dess ester n bun compagn, che mostra che vignun, te süa diversité, vá bun sciöch’al é. Al é le liber che les auturies Elena y Giada se ess dejidré dan le mëteman dla scora mesana, che pó ester – a gauja dla puberté y de düc i cambiamënc – na scora danz ria.
Titto, Lily, Zahira, Alex, Mia, Julia y Eliah nes portará te na realté fata de gran desfarënzies, mo olache düc á val’ che i liëia: la tëma da ne jí nia bun sciöche ai é. Le professur Yuri ti fajará capí che les diversités é val’ de unich y che ares ne dess nia gní ascognüdes, mo aprijades y mostrades.
Implü ó chësc liber dé inant le messaje che canche al é val’ che ne vá nia, pól ester n gran aiüt da baié y se daurí a zacai y che an ne dess nia de dodé, ciodiche al ti sozed a düc val’ iade da ne se sté nia saurí cun se intësc.
Elena y Giada é dla minunga che: "Na burta esperiënza ne dess nia madër resté na burta esperiënza, mo ara dess ester n insegnamënt o n aiüt por zacai d’atri; ince fora de de bur’ recorc pón fá val’ de bel, sciöche la creaziun de n liber".
Le liber "Sciöch’i sun vái bun" gnará presenté ai 27 de forá dales 16:00 tl Zënter "Saj.un" a La Ila. Al ves aspeta na picia ora de letöra y dessigné por plü pici y gragn.

T’La Usc di Ladins di 23 de forá, sot le Ciantun dla Uniun Ladins Val Badia, podëise gní lassura deplü y lí na intervista cun Elena Nagler.