La Usc di Ladins

En sabeda ai 24 de forá á la Lia di Paurs dl Südtirol tigní a Balsan süa sentada generala. Te chësta ocajiun él oramai bele na tradiziun da surandé i Pesć por i paurs ala munt – n pest che vëgn metü a desposiziun dales Casses Raiffeisen dl Südtirol, por familia che laora i lüsc te na manira esemplara, zënza sconé bries y fadies y ince cun n spirit inovatif. Döt chësc porta pro da mantigní la contrada y la cultura tradizionala da paurs. "Le pest é n sëgn de reconescënza y aprijamënt" á alzé fora le presidënt dla Federaziun Raiffeisen Herbert von Leon, che á premié en chësc de trëi families.
Dlungia la familia Telser dl Kartatschhof da Matsch a Mals y la familia Breitenberger dl Hof Essen a St. Pankraz te Ulten él ince gnü premié la familia de Michele y Lucia Valentin dl lüch "Chi Prà" a Badia, che á mostré te chisc agn la orenté da lauré le lüch, da le svilupé inant y ince da mëte sö pilastri economics nüs, cun la spezialisaziun sön la produziun de ciajos y l’ativité de agriturism.

Deplü podëise lí t’La Usc di Ladins dl 1. de merz  (pablo)