La Usc di Ladins

Val dl Isarch – Nce chëst ann ie l’ansciuda tla Val de Isarch y tl Wipptal tl sëni dl’ena gastronomica “Sëures dla Val de Isarch”. Doi enes alalongia iel ustaries che fej pea da Sterzing nchin Perbian, che vizia si ghesć cun derzedes gastronomiches y nvieia a ciarcë.

Enes gastronomiches cun na tradizion longia
Ntan che la natura se descëida y n vëija i prims sënies dl’ansciuda nvieia la Val de Isarch a scuvrì sëures nueves. “Sëures dla Val de Isarch” ie l’ena gastronomica plu vedla de Südtirol y ie na scumenciadiva metuda a jì dala Lia di Osć dl raion (HGV) che uel valorisé la ufierta dla spëisa dla Val de Isarch y dl Wipptal y pieta derzedes tradiziuneles, ma nce nterpretazions criatives cun prudoc locai y de cualità.

Relazion danter regiunalità y gastronomia
La “Sëures dla Val de Isarch” ti dà truepa mpurtanza ala relazion danter produtëures dl post, osć y ghesć. Chësta sinergia renfurzea la regiunalità y sotrissea l valor dl’agricultura de nosc raion. Per njinië ca i cëives tla ustaries che fej pea, vëniel tëut ca mo de plu prudoc dl raion che ti dà ala rezetes na sëur sterscia y autentica. Nscila vëniel tëut ca prudoc locai coche prudoc dal lat, salverjina y ueves da alevamënt alalergia, verdura coche craut, patac y runi o nce blava coche orde, furmenton, siela y ierbes y spezies che ie elemënc essenziei per i cëives da d’ansciuda.

Chëst ann iel inò unit a s’l dé pra la “Sëures dla Val de Isarch”, na cunlaurazion cun i prudoc cun la merca de cualità de Südtriol coche l miel o i mëiles de Südtirol IGP. Chësta materies primes de cualità auta y nce l ciociul dla region dl Cunsorz per la prutezion dl ciociul de Südtirol abinen tl menù y les sotrissea donca la cualità di prudoc. Sibe i prudoc coche nce i produtëures vën ntegrei ativamënter tl cheder dl program dla “Sëures dla Val de Isarch”.

Fé pea y vënc
Da tradizion pra l’ena gastronomica toca ntant nce l juech cun pesć, ulache n possa nce fé pea online. Duc i partezipanc y la partezipantes à la puscibltà de vëncer bonns da jì a maië te una dla ustaries che ie leprò. L se paia perchël a fé pea!

La ustaries che fej pea pra la “Sëures dla Val de Isarch” ti dona nce chëst ann na pert dl davani ala “Trotzdem reden“ de Persenon, che à l fin de sustenì persones che ne n’ie nia plu bones de rujené.
Sun www.eisacktalerkost.info iel da abiné duta la nfurmazions n con’ dla Ena gastronomica dla Val dl Isarch.