La Usc di Ladins

En sabeda ai 2 de setëmber él gnü desfiré la setima ediziun dla gara "Kronplatz King MTB Marathon", che valô ince sciöche ultima tapa dla seria "Marathonman Europe". Puntualmënter dales 8:00 da doman é piá ia d’Al Plan demez atletes y atlec che fajô le percurs lunch – le "King Marathon" cun sü 64 km y 3.150 metri de deslivel. Na cherdora dedô i ára toché a chi dla "Prince Classic", n pü’ plü "morjela" cun 49 km y 2.160 metri. Le travert ê por intrames les categories le medemo: la munt de Plan de Corones a 2.275 metri, dan la ciampana "Concordia".
Sön le percurs lunch l’á ala fin davagnada Leonardo Paez dala Colombia, che á taié le travert te 3:16,45 ores. So inom n’é nia nü. Al â bele davagné la ediziun dl ann passé, sciöche ince chëra dl 2013, canche la gara â ciamó inom "Plan de Corones MTB Race". Tla categoria dles ëres él sté la todëscia Tanja Priller che á podü se vistí la corona da reina. Danter i partezipanc – söl lunch y söl cört – él ince sté n valgügn ladins. (pablo)

Deplü sön la gara y les classifiches podëise lí t’La Usc di Ladins di 8 de setëmber

Fotos: © Gianvito Coco