La Usc di Ladins

Ara ne vá nia da jí dlungia la classa y esperiënza dla Spolpo ia, sce an baia dla tradiziun dla musiga rock te Südtirol. Porchël unse orü tó sö contat cun Alessandro Trebo da San Martin de Tor, che vir y laora aldedaincö a Berlin tla Germania. Alessandro Trebo é na pert importanta dla "Spolpo Blues Band", y al fej pert dla formaziun plü nöia y lungia tla cariera dla band, al é lapró da passa 20 agn incá.

"Pleased to meet you" (Al é n plajëi da te conësce)

I adorun na pert de n test conesciü di Rolling Stones por invié ia la intervista cun le pianist y keyboarder Alessandro Trebo. Le passus é tut fora dla ciantia si Stones "Sympathy for de Devil".

La Usc: Alessandro

• La "Spolpo" aldedaincö, cun Eric Siviero, Agostino Accarino, Jack Alemanno, Werner Heidegger (Haifisch) y Alessandro Trebo.
•  

View the embedded image gallery online at:
https://www.lausc.it/valedes-ladines/val-badia/16988-40-agn-de-musiga-tl-sanch#sigProId7c23bf0db1

Trebo, c’é pa por te la Spolpo?
Alessandro Trebo: "Por me é la Spolpo le pröm grup musical de livel profescional cun chël che iö á podü soné, y ince mia 'scora de paladina' ti pröms agn de mia cariera profescionala."

40 agn é na vita lungia por na band, te recordeste ciamó to pröm contat cun la Spolpo?
"Iö me recordi da avëi odü n conzert alaleria dla Spolpo Blues Band tl invern dl 1996 sön Plan de Corones, iló â la Spolpo soné l’introduziun a Zucchero Fornaciari: al sará sté 5.000 porsones y al m’â imprescioné le fat, che na band locala podess soné a n te’ bun livel da podëi partí la paladina con n artist dl caliber de Zucchero. Te chël momënt m’ái dejidré da podëi ince iö n de soné cun na band tan sterscia. 
Te chi agn studiâi a Porsenú y i me recordi che al ê iló n pub, le 'Dampfkessel', che fajô 'jam sessions' vigni jöbia sëra, davertes a musizisć jogn. Sambëgn ái metü man da les frecuenté y tla 'home band' che fajô da basa dla 'jam session' êl dui componënc dla Spolpo Blues Band, Jack Alemanno y Werner "Haifisch" Heidegger. Ai ê restá imprescioná da mia energia musicala dër spontana y ai m’â damané sce i ess soné cun ëi pro la Band 'Musikkapelle', olache al sonâ ince le secundo chitarist y vocalist dla Spolpo, Erich Siviero. Al é tler che i ti á dit de sce zënza pisimé y me lascé petlé dui iadi. I ún soné por dui agn cun gran suzes y tröc conzerc, y spo él capité che le secundo chitarist dla Spolpo á messü desdí n conzert al ultim momënt, donca ái iö messü le sostituí: dailó ái spo imparé a conësce Agostino Accarino: chël conzert ê jü dër bun. Spo ái metü man da soné datrai cun ëi, canche al ê plü budget a desposiziun, y nuncaltan á l’ater chitarist lascé la band, y da zirca l’ann 2000 sunsi ofizialmënter n mëmber dla band."

Le conzert dla "Spolpo" é chësta domënia da misdé inant sön Börz.

Liede do deplü tla ediziun nöia stampada o söl e-paper de La Usc di Ladins!