La Usc di Ladins

Bele sëgn pó zitadins de Südtirol se möie lëdiamënter zënza autodetlaraziun y motifs sides te Südtirol co tl Trentin (tla Regiun TN-BZ).
Por motifs de laur y sanité ne mëss porsones che röia te Südtirol nia plü jí en carantena por 14 dis. Le medem vel por studënc de Südtirol che vá foradecá por gaujes importantes de stüde y vëgn indó zoruch.
Lapró vëgnel cun le de 3 de jügn 2020 la mobilité lëdia dles porsones danter les regiuns dla Talia. Y vigni porsona dl’Europa pó indó ite tla Talia zënza dé dant n motif y zënza messëi jí en carantena.
Por i zitadins dal‘Europa, y ince da fora dl’Europa, che vëgn te Südtirol a lauré, él gnü ciafé la soluziuns che sü pröms catordesc dis pro le datur de laur südtiroleje vel desco tëmp de "carantena".

I 2 metri romagn
La lege provinziala de Südtirol che scri dant les destanzes de 2 metri danter les porsones (nia familiares) te Südtirol ti areai alaleria resta inant. Sot i 2 metri él scrit dant da anuzé le mascherot. De chësc vers n’él gnü sëgn degöna novité! Ti ambiënc daite y stlüc él tres dovëi da porté le mascherot. Chësc vel ince por botëghes y autobusc. Na ezeziun él odü danfora por i momënc che an bër y mangia tles ostaries.

Zëntri de fitness y manifestaziuns
Ai 25 de ma 2020 podará daurí i stüdi de fitness. Por chësc fin dará fora la Provinzia chisc dis na ordinanza aposta. Les repartiziuns provinziales é ince tl laur da lauré fora desposiziuns monüdes por chini, manifestaziuns culturales y conzerc – insciö Kompatscher.  (Iaco Rigo)