La Usc di Ladins

C’é pa Phōnē?
Phōnē é n proiet de teater a livel europeich por lingac de mendranza (https://phone.rml-theatre.eu/introduction/). Por le lingaz ladin y le grup ladin él le Stadttheater da Bornech che tól pert (na precondiziun é na strotöra y organisaziun teatrala profescionala) y la seziun dl teater amatorial (le "Community-Theater") vëgn coordinada da Nadia Rungger cun la joblera y regista Viktoria Obermarzoner. D'isté 2024 saral la puscibilité de na incuntada a La Pli cun jobleres y jobleri da döta Europa, de ot mendranza linguistiches autoctones che fej pert dl proiet.

De ci trata pa le teater? Te ci lingaz él pa?
Le Community-Theater crësc cun dötes les partezipantes y düc i partezipanc, sües idees, esperiënzes y individualités. Les tematiches che phōnē dá dant é lingaz, natöra y dagní, che an pó interpreté a na manira lëdia y personala y che dess daurí n dialogh danter les generaziuns. Les aturies y i aturs pó baié y rezité te so idiom ladin y al sará ince lerch por le plurilinguism y por le barat cun formes desferëntes dl'ert.

Can él pa les proes y la presentazion?
La presentaziun dl toch de teater é preodüda d'aisciöda tla Val Badia. Les dates dles proes gnará fates fora deboriada dala pröma incuntada inant. Les proes sará bunamënter tl Stadttheater a Bornech. Preodü él trëi incuntades en chësc ann y do na palsa da pié ia de jená.

Can él pa la pröma incuntada?
La pröma incuntada é en domënia ai 12.11.2023 dales 9:00-13:00 tl Teater de cité a Bornech (https://stadttheater.eu/). Al é n workshop de teater cun la aturia y regista Viktoria Obermarzoner (https://www.viktoriaobermarzoner.com/). Tla pröma incuntada gnaral baié y cunté dl proiet y le grup imparatá da se conësce.

Chi che á interes pó se anunzié pro Nadia Rungger nadia.rungger@gmail.com o tel. 3339623614. L workshop y lapartezipaziun al proiet é debann.