La Usc di Ladins

La Region Trentin Südtirol pel esser stolza del recognosciment che ge é stat sport enstadì. E la pel esser stolza soraldut percheche se trata de n pest che no vèrda demò al passà, ma che se ouc soraldut al davegnir. Ai 15 de aost a Bodø, te la Norvegia (capitala de la cultura europeèna 2024), a la fin de l’Assemblea Europeèna de la Regions, al Trentin Südtirol ge é stat consegnà defat l pest MYFER (Most Youth-Friendly European Region), desche Region europeèna più a mesura di joegn.

L’ARE l é la maor rei indipendenta de la regions de l’Europa slarièda e la tol ite ben 270 regions de 33 Paijes desferenc e 16 organisazions interregionèles, anter chestes ence l’Euregio, e vigni doi egn la dèsc chest pest, l più prestigious a livel european per la Regions. Chest’outa l recognosciment é jit apontin a la Region Trentin Südtirol, ensema con la Region croata de Krapina e del Zagorje.

A ge fèr vadagnèr l pest a noscia Region l é stat l projet ‘Schools Beyond Regions and Borders’. Se trata de n projet de educazion a la zitadinanza che é peà via del 2021.

Su La Usc stampèda de vender ai 23 de aost se pel leger de più sul projet e su l'esperienza fata dai studenc de la Scola ladina de Fascia.  (Lucia Gross)