La Usc di Ladins

Sostëgn bunorí por families
N aiüt por les families che ciafa n viadú, sëgn ince a Picolin
Le Sorvisc ti pîta ales families, ales umes y ai peri le sostëgn de n grup multiprofescional tratan la gravidanza y do la nasciüda, por prevení che certes situaziuns pois gní massa problematiches. En particolar vëgnel pité: Sostëgn ales families te de ries situaziuns; soluziuns por smendrí le stres familiar; al vëgn ponsé a strategies desvalies svilupades adöm por ciafé soluziuns; renforz de döta la familia; düc i mituns dess avëi les medemes poscibilités; al dess gní realisé cosses tignon cunt dl cheder complet por sostigní la familia.
Dl team fej pert döes educadësses soziales, na assistënta soziala, döes colabora­dësses dl sorvisc de consulënza dla uma cun formaziun tl Pröm Aiüt Emozional, na psicologa y psicoterapeuta spezialisada tla relaziun danter uma – möt ti pröms agn de vita. Le sorvisc é ponsé sciöche prevenziun por i pers tratan la gravidanza, sciöche ince do la nasciüda cina al terzo ann de vita dl möt plü pice te familia. Le sorvisc laora sön na basa volontara y é debann. Dai 7 de forá inant sarál ince tl Raiun soziosanitar a Picolin na porsona dales 8:45 ales 11:30. An pó ince tó n termin al 333 6203945; le numer é atif dal lönesc ala jöbia dales 8:00 ales 12:00 y dales 13:30 ales 16:00. Te Raiun a Picolin sará la porsona n iade al mëis da abiné: 14.03., 11.04., 09.05. y 06.06.

Sjaella
I Jëuni de Mujiga de Gherdëina nvieia al cunzert dla ensemble vocal Sjaella, n mierculdi ai 5 de fauré dala 20:00 tla dlieja de Sëlva
L ensemble a cappella de Leipzig, metù su tl 2005, ie metù adum da Viola Blache (sopran), Franziska Eberhardt (so­pran), Marie Fenske (so­pran), Marie Charlotte Seidel (mezzosopran), Helene Erben (alt), Luisa Klose (alt). Per l cunzert de chësta sëira àn cris ora l program «Nordic Night» (sëira nordica).

Conzert dla »Youth Wind Band«
La band jonila dla Val Badia se lascia aldí te n conzert ai 9 de forá a La Ila
La »Val Badia Youth Wind Band« inviëia ince chësc ann a so conzert, che gnará tigní en domënia ai 9 de forá dales 18:00, tla Ciasa dla Cultura a La Ila. Lascesse porté fora por na sëra plëna de melodies modernes y da film.

Alpaca y ert: na mostra de solidarità per l Perù
La grupa Gherdëina per l Perù mët a jì na mostra d’ert per n bon fin, dai 6 nchin ai 23 de fauré tla Lia Mostra d’Ert a Urtijëi
Ert y altruism se anconta te n gran proiet de solidarietà, che à l fin de sustenì la families pueres dl Perù. Tla berstots dl’Operazione Mato Grosso mpera l’ëiles a fé cosses de lana d’alpaca da na gran cualità, coche sbetri, guanc, manëces, cazines y nscila inant. Do avëi fat la scola pòsseles viver inant de chësc ert, zënza messëi migré nzaul d’auter.
N valgunes de chësta cosses fates a man unirà metudes ora dai 6 ai 23 de fauré tl Circolo Lia Mostra d’Ert. Orar de giaurida: 09:30-12:00 e 15:00-19:00, de vënderdì y sada nce dala 20:00 ala 22:00
Sce n compra un di prudoc tla mostra, fac cun gran amor, prufescionalità y mpëni, saràl mesun ti dé n sustëni cuncret a chësta families, acioche les posse se fé su n miëur daunì.

Lezions debant de ciantèr e teater
La Scola »Le Muse e le Dolomiti« speta i bec dai 6 egn en su te la senta te la scoles de Moena
La Scola Interregionèla per emparèr a ciantèr e fèr teater per bec e joegn dai 6 egn en su, proponeta da la Sociazion »Le Muse e le Dolomiti«, sporc lezions debant de proa amò per dut l meis de firé. Te sia senta a Moena, te sala Si­monin Maza de la scoles, la Maestra Oda Zoe Hochscheid speta de mèrtesc domesdì, con oraries de poder concordèr, i bec e i joegn che vel emparèr a ciantèr e fèr teater. No l é besegn de aer cogno­scenzes musicales: pel proèr duc chenc. La musega la é emportanta per la crescimonia di bec e con »Le Muse e le Dolomiti« i empèra ence a fèr teater. Per info www.musedolomiti.it o chiamèr la presidenta Oda Zoe Hochscheid al numer de telefon 342 9147711.