La Usc di Ladins

"Vigni caje é n caje demassa. Trö’ demassa", é les prömes parores che le Vësco Ivo Muser á pronunzié en lönesc ai 20 de jená. En chël de él gnü presenté i resultac de na inrescida independënta sön i caji de abus sessual al intern dla dlijia te nosta diozeja, dala istituziun l’ann 1964 cina al 2023. La inrescida é gnüda portada inant dal stüde de avocac Westpfahl Spilker Wastl da Minca, cun la colaboraziun dl stüde Kofler, Baumgartner & Partner da Bornech. Al é sté la Diozeja instëssa che â inciarié i avocac da se dé jö cun chësc capitul scür, por porté a löm na plaia che ne lascia nia da sangoné.
Fac che la Dlijia á baldi gonot scuté ia, bagatelisé, traté cun massa superfizialité, ignoré. N capitul olache ara á plü gonot ciaré da sconé i responsabli y tut massa püch söl scerio les vitimes. Impó é i caji gnüs a löm püch pro n püch, ci che scherza sö tres danü les ferides dles vitimes y destënn sura döta la Dlijia – ince sön la gran maioranza de chi che operëia indortöra – de gran ambries.

T’La Usc di Ladins di 31 de jená ves dijunse deplü sön la inrescida independënta, sön la reaziun da pert dla Diozeja y sön i provedimënc che an tol da atira por prevení, controlé y traté caji eventuai dl dagní. Lapró unse ince na intervista cun le vicar general siur Eugen Runggaldier, che sotrissëia l’importanza da ti ciaré tl müs ala realté, nen baié publicamënter, ince sciöche vare por davagné zoruch credibilité.  (pablo)