La Usc di Ladins

Viac de cater dis tla Liguria
La grupa KVW de S. Cristina mët nce chëst ann a jì l viac tradiziunel da d’ansciuda, dai 24 nchin ai 27 de auril
Chëst ann jiràn tla Liguria, plu avisa a Genova, Sestri Levante, Portofino, Santa Margherita Ligure y Camogli. L vën pià via de juebia ai 24 de auril per furné de viers de Piacenza, ulache n jirà a ti cialé ala zità cun n mëinajites dl luech. Do marënda furneràn a Sestri Levante, ulache n arà n hotel per la proscima trëi sëires, da ulà che n pëierà via per la jites di proscims dis. A Genova jiran a vijité la zità, l Porto Antico y l »Aquario«.
La sada furneràn cun na berca nchin Porto­fino, Camogli y Santa Margherita Ligure. La dumënia, ultimo di, vijiteràn la curtina monumentela de Staglieno. Do la marënda a Nervi pieràn de viers de cësa. L’iscrizions sarà n merdi ai 4 de fauré dala 08:00 nchin la 11:00 tla sala Raiffeisen dl chemun de S.Cristina. Da tò pea iel la cherta d’identità y la cherta sanitera, deberieda cun l’adres e-mail. La grupa KVW de S.Cristina se ncunforta sun Vosc unì.

Sëlva 2040
L Chemun de Sëlva nvieia a n domesdì de nfurmazion n con’ dl resultat dla elaburazion dl Program de svilup cumenel per l teritore y la cuntreda, n merdi ai 28 de jené dala 16:00 tla Cësa de Cultura de Sëlva
L Program de svilup cumenel per l teritore y la cuntreda ie n documënt de planificazion urbanistica, ulache n vëija dant i ubietifs per n svilup sustenibl dl Chemun. L program trata dantaldut la tematiches dl nsediamënt, dl turism, dla cuntreda y dla mubiltà.
L unirà rujenà de coche i:la zitadins:nes à respundù al cuestioner dl luech, cie che la grupes de lëur à laurà ora, cie che l program metù su dai tecnics nciariei vëija dant, co che n po’ garantì na cualità de vita y de lëur ala generazions che vën do. Sambën ti jiràn nce do ala cuestions coche chësc svilup possa vester sustenibl per l Chemun, co che n pudëssa miuré la mubiltà y l trafich, coche l sarà cun l frabiché na cësa per la familia tl daunì. Ciuna strutures per l’istruzion y per l sport pòssen pa pité ala proscima generazions? Co pòssen pa stravardé la cuntreda y la ressorses natureles dl raion?

Aqua²: Cunzert dl cor Flat Caps de Bulsan
Tla Cësa di Cungresc de Urtijëi saràl n dumënia ai 2 de fauré dala 18:00 n cunzert di Flat Caps. L medemo cunzert sarà da audì nce l di dant, sada ai 1. de fauré dala 20:00 tl Teater »Gino Coseri« a Leifers
L se trata de n cunzert de mujiga moderna n con’ dla tematica dl’ega. Ursula Mühlberger y Sylvia Lanz (vidula), Ester Car-turan (viola), Nathan Chizzali (celo) y Georg Malfertheiner (per­cuscions), cumpanierà l cor sot ala direzion de Aaron Demez.
Sëuraprò uniràl mustrà videos sot al’ega fac aposta per l cunzert da Claudia Rubner.
Moderazion: Sabine Amhof.
Ntreda: 15 €, 10 € per mutons sot ai 14 ani. Chertes danora possen apusté mandan n sms o n messaje Whatsapp al numer 351 6846544.

Ostí sön la dlacia
Ai 30 de jená pón tó pert a n aperitif sön le Lech da Sompunt, deperpo che i jadinadus dl Ice Club Alta Badia fajará na esibiziun
Pro le »Ostí sön la dlacia« se tratera de na novité che vëgn metüda a jí ai 30 de jená dales 17:00 ales 19:00, sön le Lech da Sompunt a Badia. I partezipanc á la poscibilité da jí a pe sön n percurs de tapec metüs jö diretamënter sön la dlacia, olache an pó ciarcé pro deplü stonc spezialités arjignades ca da coghi dl post. Lapró sarál deplü sommeliers de Südtirol che jará incërch cun i jadins a lascé ciarcé vins locai. Le grup dles jadinadësses y di jadinadus dl Ice Club Alta Badia acompagnará la sëra portan dant n valgönes esibiziuns sön la dlacia. Sambëgn ne manciarál nia val’ boanda cialda por se scialdé. Por tó pert ala manifestaziun mësson se scrí ite al prisc de 60,00€ por adulc y 40,00€ por mituns da 6 a 12 agn, pro i ofizi turistics dl’Alta Badia o sön www.altabadia.org, olache an ciafa ince deplü informaziuns. I posć é limitá. Sce al ess da ester bur’ tëmp, gnará la manifestaziun spostada ai 13 de forá.

La Scola »Le Muse e le Dolomiti« aur si ujes
Te la senta de Moena vegn fat lezions de proa debant per i bec dai 6 egn en su
La Scola Interregionèla per emparèr a ciantèr e fèr teater per bec e joegn dai 6 egn en su, proponeta da la Sociazion »Le Muse e le Dolomiti«, é ativa ence te Fascia. Te sia senta a Moena, te sala Simonin Maza de la scoles, la maestra Oda Zoe Hochscheid tol dant de mèrtesc domesdì duc i bec e i joegn che vel emparèr a ciantèr e fèr teater.
Via per i meisc de jené e firé la Scola Interregionèla met dant lezions de proa debant. No l é besegn de aer cognoscenzes musicales: pel proèr duc chenc. La musega la é emportanta per la crescimonia di bec, n ambient musical stimolant l à efec positives sul svilup emotif e cognitif di bec e joegn. Per info www.musedolomiti.it o chiamèr la presidenta Oda Zoe Hochscheid al numer de telefon 342 9147711.

Ismaele Soraperra tl Tublà da Nives te Sëlva
L Tublà da Nives nvieia de cuer ala giaurida dla mostra »Träume/Vanishing« de Ismaele Soraperra, n sada ai 25 de jené dala 20:00
L proiet »Träume/Vanishing« va ite sot tl cuer de na generazion che se mët a cunfront cun n contest vivù te na maniera for plu desvaliva y che se muda tresora. Tres na esposizion vijiva, metuda ora co­che instalazion y sperimentazion, sotrissea l pro­iet la sfëntes y la iregulariteies che caraterisea nosc tëmp. Chësc proiet ne n’ie nia mé na repre­jentazion estetica, ma l uel descedé tl spetadëur la ueia de pensé do, l nvian a definì da nuef l raport cun la realtà che ie ntëurvia.
La mostra resta davierta nchin ai 21 de fauré, uni di ora dl lunesc dala 15:00 ala 18:00.

Sostëgn bunorí por families
N aiüt por les families che ciafa n viadú, sëgn ince a Picolin
Le Sorvisc ti pîta ales families, ales umes y ai peri le sostëgn de n grup multiprofescional tratan la gravidanza y do la nasciüda, por prevení che certes situaziuns pois gní massa problematiches. En particolar vëgnel pité: Sostëgn ales families te de ries situaziuns; soluziuns por smendrí le stres familiar; al vëgn ponsé a strategies desvalies svilupades adöm por ciafé soluziuns; renforz de döta la familia; düc i mituns dess avëi les medemes poscibilités; al dess gní realisé cosses tignon cunt dl cheder complet por sostigní la familia.
Dl team fej pert döes educadësses soziales, na assistënta soziala, döes colabora­dësses dl sorvisc de consulënza dla uma cun formaziun tl Pröm Aiüt Emozional, na psicologa y psicoterapeuta spezialisada tla relaziun danter uma – möt ti pröms agn de vita. Le sorvisc é ponsé sciöche prevenziun por i pers tratan la gravidanza, sciöche ince do la nasciüda cina al terzo ann de vita dl möt plü pice te familia. Le sorvisc laora sön na basa volontara y é debann. Dai 7 de forá inant sarál ince tl Raiun soziosanitar a Picolin na porsona dales 8:45 ales 11:30. An pó ince tó n termin al 333 6203945; le numer é atif dal lönesc ala jöbia dales 8:00 ales 12:00 y dales 13:30 ales 16:00. Te Raiun a Picolin sará la porsona n iade al mëis da abiné: 14.03., 11.04., 09.05. y 06.06.