La Usc di Ladins

De chësta novité nen unse baié cun le diretur Valentin Erlacher, che nes dij ince deplü sön la situaziun cun le personal y i sorvisc, de tan y ciodí che an á messü aumenté les retes, y sce le bar nü á arjunt i traverc che an s’â tut dant.

Diretur, le 2025 á metü man cun na buna noela por les ciases de Palsa ladines. La Regiun á alzé i contribuc che i podëis insciö tó ca por curí l’indenité dl personal por l’adoranza dl ladin. Ci che jô zënza sön ’les sciables’ de berbesc y mëdes. Rodunt Os âse porté dant chësta ghiranza l’ann passé. É pa chësta sëgn la soluziun?
Plü co na soluziun él n vare tla dërta direziun. Al é da reconësce che la Regiun á aumenté i contribuc, che ó dí por nos za. 76 mile euro implü por le 2025. Cun chi ne rovunse indere nia ciamó al travert ch’i pretenun. Al é dërt che le personal ciafes l’indenité de trilinguism, vëgn pö chësta scrita dant por lege. Chësc comporta indere por la Ciasa n gran cost implü de za. 240 mile euro al ann. Pro les atres istituziuns sciöche comuns, scores, ez. vëgn chësta indenité surantuta 1 a 1 dala Provinzia; nos ciafun indere n contribut che ne pó nia surpassé le 80%, chël ó dí che ci che romagn messunse finanzié cun na reta plü alta. Cun le contribut nü unse impó ciamó da curí 64 mile euro, che fej fora por i berbesc na reta de püch plü co 2 euro al de plü alta. Nos damanun che la man publica, che nes scrí dant por lege da paié fora l’indenité, la surantoles ince deplëgn sciöche por les atres istituziuns publiches. La sconanza dl lingaz dla mendranza ladina y todëscia é pö ala basa dl’autonomia de Südtirol. Insciö n’odunse nia dërt che la mendranza instëssa, o le zitadin singul, mëss instës se finanzié i dërc che la mendranza á.

Na domanda forsc n pü’ provocanta y ince placativa: ciafon pa ciamó personal ladin che vëgn a lauré te Ciasa de palsa?
Cun le personal ésera sciöche ti atri seturs. Al é plü rî, ci che é ciamó dit morjel. Ester él feter imposcibl. Dantadöt stentunse pro operadësses sozioassistenziales, o ince pro infermieres, olache i sun pa insciö ciamó metüs bun. Operadus soziosanitars sunse metüs miú, mo i n’adorun tres, dantadöt deache ti proscims agn n’él deplü che vá en ponsiun.

Na gran novité é che cun i 14 de jená é rovada te ciasa de palsa ince la inteliënza artifiziala. Te ci forma pa y ciodí pa?
I mëti man cun le ciodí. Sce al é de un n vers tres manco personal, messunse almanco ciaré da ti alisiré le laur, por che al ne vais nia altró. Personalmënter sunse dla convinziun che i messun ince valuté les tecnologies nöies, zënza les stlü fora a priori. Do che i s’un informé y sun jüs fora por Südtirol a ciaré, unse tut la dezijiun da istalé cun le 2025 le sistem Ancelia dla dita TeiaCare, na dita da Milan che pîta n sorvisc de sostëgn tla cura, olache n sensor segnalëia sön le fonin sce al é situaziuns de prigo: p. ej. sce n berba o na mëda proa da gní fora de let y manacia da tomé, sce al é massa dî te let tla medema posiziun y i.i.. Al é n stromënt che ’impara a conësce’ i berbesc y ince le personal, che ne mëss spo magari nia salté 10 iadi te na ciamena, mo pó odëi sön le fonin sce al vá debojëgn. Al é n pü’ sciöche ciaré virtualmëner da porta ite. I arati che ti proscims agn sarál n gran svilup de chësc vers y che i messunse tó en conscidraziun ince les tecnologies nöies. Chiló ne messunse se inventé nia de nü, deache te posć altró é chisc sistems bele pert integranta dla cura y assistënza.

Döta la intervista podëse lí t’La Usc di Ladins di 24 de jená  (pablo)