La Usc di Ladins

Le cërtl de gares VSS é jü inant en domënia ai 19 de jená söl Sest, olache i pici atlec dles categories superbaby cina U12 á desfiré so pröm slalom lerch de chësta sajun. Jüda ésera plü co bun, cun döes devëntes y bëgn 9 podesć. Sc’i jun daimprossö, spo é le pröm bele garaté pro les superbaby, olache Ludovica Tiezza dl ST Alta Badia á arjunt le 2. plazamënt cun 28.51, do da Nelly Narzizi dl SC Ahrntal. Inant ésera jüda cun la U9, olache Joel Call dl SC Al Plan é gnü 2. cun 58.05, do da Joy Happacher dl ASC 3 Zinnen. Pro la U10 á i ladins davagné döt adöm. Pro i mituns é le podest döt dl SC Al Plan cun la devënta de Simon Palfrader cun 53.04, dan da Toni Erlacher cun 54.39 y Andrea Clara cun 55.36. Pro les mitans él sté Giorgia Tiezza dl ST Alta Badia che á davagné cun 55.19, dan da Anna Winkler dl SC Al Plan cun 56.00. Inant vára cun la U11, olache Ellen Alfarei dl ST Alta Badia s’á assiguré le 2. post cun 56.31, do da Franziska Hintner dl Gsiesertal ASV. Inultima ciamó le podest tla U12, olache Jonas Rindler dl SC Al Plan é gnü 2. cun 53.83, do da Fabian Plankensteiner dl Tasten. Cun düc chisc resultac, s’á lö eSC Al Plan indô metü a saul le pröm post de scuadra cun 480 punc, dan le ASC 3 Zinnen cun 469 y le Tasten cun 321.  (pablo)