La Usc di Ladins

L an 2024 se sera su col segn positif: Fascia la é cresciuda de 15 sentadins, da 9.898 dombré a la fin del 2023 a 9.913 a la fin del 2024. Do doi egn che la jia de zeruch (a la fin del 2022 l era stat registrà -46 e a la fin del 2023 -12) zacan del 2024 la se à tirà su, ma no de gra al numer de nasciui, che é resté medemi che del 2023, en dut 79. De chisc l é 47 bozoi brugn e 32 bozoi resa, a la fin del 2023 i era 40 ic e 39 eles. Ence l numer de morc no l é mudà de trop: via per l 2024 n é stat 105 (62 ic e 43 eles) e del 2023 n era stat 102 (56 ic e 46 eles). L scialdo natural a la fin del 2024, donca la desferenza anter nasciui e morc, l é de -26. L smaorament del total de jent vegn dat soraldut da la jent ruèda a stèr te Fascia da etres comuns o paijes: en dut n é vegnù ite 288 e n é se n jit 247, donca +41.

Duc i dac, comun per comun, é da poder lejer su La Usc stampèda de chest vender ai 24 de jené.
Ve recordon che podede troèr nosc sfoi ence te la boteighes de sfoes de Fascia.

 (Monica Cigolla)