La Usc di Ladins

»Chiò stajea Richard Löwy, nasciù del 1886, menà demez ai 4.1.1944, internà a Fossoli, deportà ai 22.2.1944 a Auschwitz, sassinà« coscita l é stat scrit su la Stolpersteine (pietra d’inciampo) che en mèrtesc ai 28 de jené l é stat metù ju a Someda tedant la cèsa olache Richard Löwy del 1944 l é stat ciapà e portà demez. N bel grop de sentadins, ensema ai raprejentanc de Comun, del Grop Ladin, de l’Union di Ladins de Fascia, di Scizeres e de la Scola, coi studenc de la III B del an passà e de chest an che à portà dant l projet ensema a sia professora Francesca Zulian, se à binà te cort, per recordèr chest sentadin onorarie e benefator de Moena.

L’assessora de Comun Cristina Donei, che à endrezà l moment ofizièl, à dit dantfora che »meter ju la Stolpersteine l é n varech en più per recordar Richard Löwy.« L é stat dapò la professora Zulian che à spiegà con de bela paroles da sentiment l percors del projet. »Aon contatà la sociazion Stolpersteine de Gunter Demnig e do n scambie de email i ne à manà la pera. Chest projet ne à dat l met de cognoscer la vita de Richard Löwy, l ben che l à fat e coche i sentadins de Moena lo à didà fora, donca con chesta pera volon ge far amò onor a soa vita e recordar soa fin ingiusta.

Podede lejer dut su La Usc stampèda de en vender ai 31 de jené.  (Monica Cigolla)