La Usc di Ladins

Impröma i stödafüch y sëgn les musighes. Do che i Stüdafüch da La Ila á organisé dan chinescdé la gara di stödafüch dl raiun bassa Val de Puster, él sëgn sté la Musiga da San Martin de Tor che á cherdé alerch musicontres y musicontri dl raiun da Bornech. Sön inciaria dla Federaziun dles Musighes dl raiun de Puster él gnü metü a jí la gara raionala a Antermëia, olache i musicontri á podü se mosoré cun la liösa da Börz cina Pe de Börz, o zënza scun i schi o la brëia sön la pista d’Antermëia. Ala fin s’á presenté al start 116 partezipanc da 19 musighes plü rapresentanc dl raiun. Le partezipant plü atempé é sté Hermann Leimegger da Onies (1951) y le plü jonn Daniel Rungger da Rina, nasciü dl 2013. Chi da Rina é ince stá i musicontri plü lezitënc da tó pert, cun na bela scuadra de 15 porsones. Sce an ti ciara ai mius tëmps dl de, mësson dí che i musicontri ladins s’á en general batü dër bun. Julian Pizzinini dla Müjiga da La Ila é sté cun 35,82 le plü asvelt di ëi söi schi, Nadia Frontull dla Musiga da La Pli la plü asvelta dles ëres sön la liösa cun 1:40,85; Werner Mair dla Musiga da Rina le plü asvelt di ëi sön la liösa cun 1:29,30 y Felix Feichter dla Musiga d’Al Plan cun 1:01,84 le plü asvelt y ince le su concorënt söla brëia. Ma le primat pro la gara di schi dles ëres é jü fora en Puster, cun le miú tëmp de Annamaria Feichter dla Musiga da Tasten cun 40,48. L’organisaziun dla gara á funzioné a pontin y la Musiga da San Martin á salpü da pité n program plajor fora por döt le de, che é jü a piz domisdé ia cun la premiaziun.

I mius de vigni categoria y deplü retrac ciafëise t’La Usc di Ladins di 31 de jená  (pablo)