La Usc di Ladins

L aea fat n gran ben per la comunanza de Moena e de Fascia, l enjegner Richard Löwy, canche endèna la Gran Vera l era stat manà te chisc lesc desche comandant del Genio militar austro-ungarich. Tant da vegnir declarà, trop più tèrt, sentadin de onor.

Chest no à ampò bastà, do l 1940, a schivèr de vegnir ciapà dai sudé todesc, portà demez da chela cèsa de Someda olache l era vegnù a chierir de sciampèr dal sterminie, e portà a Auschwitz olache l é mort con sia familia. Tropes moenac enlouta lo aea didà, ma no duc: zachei aea fat scì che i nazisć rue a l troèr fora.

En ocajion del dì de la memoria l’aministrazion de Comun, che a Richard Löwy ge à jà dedicà la strèda maora del paisc, ensema con la Scola de Fascia, avisa la 3B de la scola mesènes del paisc con la prof.a Francesca Zulian, la vel lascèr n segn amò più chièr de l’emportanza de no desmentièr chela piata grieva de la storia de Moena e de dut l mond, che é documentèda ence tel liber de Giorgio Jelligi "Richard Löwy. Un ebreo a Moena“, dat fora dal Istitut Cultural Ladin e dal Grop Ladin da Moena.

Doman, mèrtesc ai 29 de jené, da les 3 domesdì, dedant a la cèsa de Someda olache Richard Löwy e sia familia era stac fac prejonieres e deporté, vegnarà metù na “pietra d’inciampo”, n bolognin de laton empetonà te strèda e l Grop ladin da Moena à enjignà ence na chèrta, che reste per ne recordèr che ence nos se aon utà da l’autra, e a ne domanèr de fèr memoria per l davegnir.

 (LG)