Bëgn cotan de ladins y ladines, miscionars, monies y fredesc laics é i ultims secui gnüs cherdá dal Signur da jí tles misciuns fora por le monn a ti porté ales popolaziuns indigenes la bona noela dla religiun cristiana. Nia püc de chisc gran idealisć á messü afronté de gragn prighi, sciöche le miscionar Francësch Morlang (1828 – 1875) da La Pli de Mareo, che é sté tl Sudan i agn dal 1855 al 1863 (so Diare é gnü publiché dl 1973). Risćé la vita y patí porsecuziuns á le pater da Oies.
La monia Paola Glira da San Ciascian vir da 30 agn incá tl Zambia, tl’Africa.
Paola é nasciüda dl 1958 a San Ciascian. Ara á döes sorus y n fre: Rita é maridada a Ciavalëis y á döes mitans maridades; l’atra so Rosa vir
a San Ciascian pro so fre Franz, che fej le paur dl lüch Armentarola. La scolara Paola á albü maestri Paola Maneschg, Giuvani Valentini y Iaco Canins. Ploan ê siur Oreste Chizzali (1920 – 1983) da Col de Santa Lizia. Do la scora mesana ára fat la scora alta por le comerz a La Ila. Paola á lauré te ostaria y pro le schipass. Ara é spo jüda pro les monies combonianes che ara á conesciü tres la pratiga "Werk des Erlösers" da Milland; ara se sintî cherdada da jí jö tl’Africa. Paola á fat dui agn de postulat a Roma y le noviziat a Erba, tla provinzia de Como. Le u etern ára dé jö dl 1995. Paola é feter tres stada tl Zambia y tl Malawi, mo ince set agn a Limone sul Garda, paisc nadalin de San Daniele Comboni (1831 – 1881). L’aiüt che les monies pó pié do tl’Africa por porté inant sües operes ciaferes da benefaturs, parënc y tres i finanziamënc por i proiec che ares mët a jí. Süa Congregazion á na fondaziun Onlus che les dëida chirí aiüt. La monia Paola nes á mené n articul che cunta de so laur tl Zambia, che i publicun ion. Nosta jënt ciafa na idea ci gran y bel laur che na mognan pó fá tl’Africa a bëgn dla püra popolaziun che vir tla meseria.
(Lois Trebo)Ci che la monia Paola nes scrí, podëise lí t’La Usc di Ladins di 24 de jená
