La Usc di Ladins

Fora per l’aisciuda passèda l’APT de Fascia, très la responsabola Daniela Cigolla, la ge à domanà al Liceo artistich de la Scola Ladina de enjignèr passa 400 trofees per la garejèdes europeènes interbancaries che vegnarà metù a jir su la pistes de Fascia anter la fin de jené e l scomenz de firé 2025. Per dozenc e studenc se tratèa segur de na gran endesfida, ajache ge vegnia domanà na produzion artistica de gran empegn dal pont de veduda di numeres e che la Scola à volù tor su ajache podea esser n bon stimol per i studenc, i dozenc e l staff di laboratories.

Col scomenz del nef an de scola, la clas 4 LAD de la sezion del Design col dozent de projetazion Simone Zulian l’à tacà a studièr fora n projet da meter en esser. Anter duta la proponetes projetuèles lurèdes fora con pascion e gust dai joegn designer, l é stat cernù chela de la studenta Wendy Daberto da Fodom, scrita ite ence tel Ski & Ice college, ispirèda a la forma del esagon, sintesa del cristal de neif.
L prodot finèl che l é vegnù fora l é n trofeo de legn, decorà e endorà con la dozenta Fiorella Brunel.

De più su La Usc stampèda de en vender ai 24 de jené.  (Thomas Zulian)