La Usc di Ladins

A Laas êl sté la pröma, y Mariazell él garaté la dopleta. Florian Clara da Lungiarü á davagné süa secunda gara dla sajun, tla copa dl monn de liösa sön pista naturala. Pro la cuarta proa a Mariazell tl’Austria, tla fin dl’edema passada, âl bele tla pröma manche dé dant le tach cun le miú tëmp, tan che al ti á basté le secundo tëmp tla secunda manche, por se tigní toch la devënta. Florian Clara á stlüt jö cun le tëmp total de 1:41.36 y n vantaje de 46 centejims sön le compagn de suzesc tl dopl Patrick Pigneter cun 1:41.82. Terzo l’austriach Fabian Achenrainer a +0.66. Le campiun en ciaria Michael Scheikl dal’Austria á tla pröma manche ma arjunt le 10. tëmp. Le miú tëmp tla secunda n’á nia basté por se porté sön podest, mo impó ál ciamó fat le salt al 5. plazamënt final. I resultac de chësta gara rodosa altamo provisoriamënter la classifica generala, olache Florian Clara surantol le tomun cun 330 punc, n sofl dan Scheikl che é secundo cun 325. Terzo é le südtirolesc Alex Oberhofer cun 262.  (pablo)