Neves troes tel Fascia Bike Park

Data

23 de november 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’é stat endrezà percorsc tel bosch che servirà ence per la garejèda Enduro World Series del 2021
Fin che no l neif e no vegn massa freit va inant i lurieres de manutenzion del Fascia Bike Park e chi per la creazion de neva linees. L’obietif del Fascia Bike l’é chel de ruèr vertesc per d’istà del 2021 a l’apuntament de nonzech con la MET Enduro World Series Val de Fascia con na neva oferta dedichèda duta a la roda da mont. Un di percorsc più aprijié de la sajon 2020 l’é stat zenza dubies Rodeline: na lingia de utèdes e sauc olache i riders pel lascèr corer sia roda dal scomenz a la fin.
La neva l’é che chesta linea vegnarà smaorèda fin sun Pian de Frataces per n total de presciapech 4 chilometres e 500 metres de dislivel.
La Rodeline completa tacarà via sul percors veie a chel che se jontarà ite na streca per l’enduro, longia presciapech 1 chilometer e caraterisèda en seghit da n jir su e ju con na pèrt finèla manco erta, ma con vèlch passaje tel bosch che desfruta l teren con reijes e sasc.
Ence sun Col Rodela vegnarà endrezà l nef Rabbe Trail, n percors sorì per fèr goder esperc e pascioné, che se taca ite al Selaronda Tour. Chesta streca alternativa nasc dal recuperament de n veie troi arbandonà che passa fora per presciapech 1 chilometer l bosch de lèrjes e zirmes.
L staff del Fascia Bike à jà ciapà ence autra autorisazions per svilupèr amò de più dut l parch per la rodes. Un di neves troes jà stat proà dai pascioné fascegn l’é Animal House, n percors neigher che empromet gran devertiment. Chest percors sarà na linea de gara de la Enduro World Series 2021.
Donca de bela neves per duc i bikers. Per n saer de più se pel jir su la piates Facebook e Instagram del Fascia Bike.  (Monica Cigolla)