La Usc di Ladins

Incër 20 sogadus se á abiné sön le ciamp de Villa Condulmer, a Mogliano Veneto, tla provinzia de Treviso. Ara se trata n ciamp che á döt d'atres carateristiches respet al ciamp da Corvara, olache i badioc é ausá da soghé. Propi por chësc é la desfida sön les 18 büjes stada ciamó plü interessanta. Nora Planatscher da Corvara se confermëia ince en chësc ann campionëssa soziala. Tla categoria di ëi s'á Claudio Tiezza y Patrick Dapunt batü cina al ultim colp: Patrick l'á davagnada y é insciö deventé le nü campiun sozial 2022.

Le Golf Club Alta Badia stlüj insciö jö na sajun positiva, cn gran sodesfaziuns y ince inovaziun, ligrëza y ambiziun por la sajun da en ater ann. Le presidënt, Sergio Tiezza, adöm cun düc i sozi tol l'ocajiun por rengrazié le gran impëgn tl'organisaziun di tornés y por le sostëgn de düc i sponsors y partners dl Club y de chësc sport.  (Mattia Davare)