La Usc di Ladins

La 10ejima edizion dla garejeda de sauté “Skyrace de Matheysins” a Saint-Honoré, nia dalonc da Grenoble tla Franzia, n dumënia de Pasca ai 20 de auril, ie stata n suzes per nosc atlet Alex Oberbacher. Ël à duminà la cuinta tapa dl Merrell Skyrunner World Series. La cundizions dl tëmp ne fova nia saurides, cun nëif alauta y ghëurdli de vënt. Al ultim mumënt à perchël i urganisadëures messù mudé la trassa uriginela, tulan demez la cresta tecnica "Oreilles de Loup" y l tòch suvier "Gardino del Diavolo". Mpo ie la garejeda cun si 27 chilometri de lunghëza y 2000 metri de deslivel resteda fedele a si spirt salver y zah.

Nce l livel tecnich di atlec che à fat pea fova scialdi aut. Ma chësc ne n'à nia fermà Alex dal vëncer. Dal scumenciamënt ie l atlet di Gherdëina Runners pià via cun n ritm aut: bele pra l prim tòch da sauté suvier fòvel danora y l ne se à nia lascià tò chësta pusizion nchin ala fin. Alex à finà la garejeda te 2:25:50.

Arjonjer n tel bon resultat do la sajon da d'inviern cun la peves, ie de gran valuta per Alex, che possa nscila scumencé cun l drë' sgors si sajon de sauté. Ma śën ti cëla Alex mo al'ultima garejeda cun la peves, dan mëter via i schi: la garejeda Mezzalama ntëur al Monte Rosa che l fajerà pea deberieda cun si cumpani William Boffelli n sada ai 26 de auril. 

Per i Gherdëina Runners, Manuela Perahoner

L articul sarà da liejer tla edizion nueva de La Usc de duman vënderdi ai 2 de mei.