La Usc di Ladins

L é la bandiera ladina dai trei colores: brun, bianch e vert con te mez l’ègua del Tirol e l simbol de Fascia, l pèster storich, con la scrita Herrschaft Eves, desche l blason che se troa tel Hofburg, l Palaz vescovil de Persenon.

La é stata metuda su belapontin ai 5 de mé, dì de la bandiera ladina, da Veronica de Salin e sie om Adalbert. »Sun chel gran sas vindò albergo l era jà stat su na bandiera, chela del Tirol, descheche se veit da na veia cartolina. Coscita Adalbert se à pissà che fossa stat bel endò la meter su, ge aon pissà sora n pez co la far, volaane na bandiera con nesc simboi storiches. L’aon fata far a Silandro e Adalbert se à cruzià de far la stengia che la é auta 6,5 metri. La bandiera é de 4 metri, l’aon tirada su proprio ai 5 de mé. Aon spetà che sone le ciampane dal mesdì, aon avert na bocia e fat na bona marena duc ensema, con mie barbesc e amisc, aon festejà l dì de la bandiera ladina« ne à contà Veronica de Salin.

Ades chela bela bandiera la se mef lijiera tel vent fascian, la é lo stolza sul gran sas e la ne recorda, ogne outa che passon sun stradon, noscia reijes ladines.  (MCI)