La Usc di Ladins

L Consei de l’Union di Ladins de Fascia chiamà ite en vender ai 30 de aost se à avert con n moment particolèr. Te chesta ocajion, defat, l é stat envià te la neva senta te Ciasa de la Moniaria Francesco Mazzel, stat patron e ènema de Radio Studio Record per zirca 30 egn egn alalongia, e sia femena Giusy Vian.

L president Fernando Brunel, ensema con i doi vizepresidenc Melissa Locatin e Stefano Weiss e con entornvia i etres conseieres de la sociazion, i ge à sport a Franz e Giusy na statua de Sènt’Ugèna patrona de Fascia, n picol don a rengraziament per l lonch empegn portà inant te la Radio per ge dèr ousc a noscia comunanza e ence na bela lèrga al lengaz ladin, à dit l president Brunel.

Franz Mazzel à recordà la bona colaborazion con l’Union di Ladins, che dal 2005 inant ge à permetù de manèr fora a Radio Studio Record desvaliva trasmiscions per ladin, apede a cheles fates da colaboradores preziouses: Annelise Vian per tropes egn e Biancarosa Florian che amò ades la laora per la radio, e en ultima ence col didament de etres joegn. Franz à amò recordà che dut chest é stat possibol de gra al sostegn del Comun General de Fascia, e che ence da man di foresć man a man ge é stat dit che i aea gust de sentir anterite l son de nosc lengaz e de aprijiament per l empegn de la comunanza de l tegnir vif.

De più, coi programes de la sociazion per chest uton, l é da poder lejer su La Usc stampèda de en vender ai 6 de setember.  (lg)