N consëi nü metü adöm da jënt jona y dër motivada, la poscibilité da ofrí n post de laur y n salt de cualité a livel editorial: chisc é i trëi punc arjunc tl 2020 che ti dá na gran sodesfaziun al presidënt nü dl’ULVB René Pescoll: "La pandemia cheriëia dificoltés, mo la lista di compic de nosta uniun ne vëgn por fortüna nia plü cörta", dijel. Y l’entusiasm da avëi podü tó sö na colaboradëssa tla direziun che dëida trá i fis romagn ince alt. Marianna Kastlunger d’Al Plan, che á surantut chësta inciaria de messé dl ann passé, confermëia "la positivité y la gran vëia da fá tla ULVB. L’atmosfera é bona".
La rama dles ativités tles manifestaziuns dla ULVB é stada n pü’ plü megra co i atri
agn, mo almanco trëi éra jüda da nen mëte a sté impé amesa les ones de pandemia: al é gnü fat le tradizional pelegrinaje a Oies, che á traverc sides religiusc sides de incuntada interladina. Finalités de comunicaziun danter les valades ladines á albü ince la rapresentaziun de "L’alber conta – Le lëgn cunta", n toch de teater ti idioms fascian y badiot, metü a jí da Simon Kostner deboriada cun l’assoziaziun teatrala "I Bontemponi" de Poza de Fascia: pro chësc proiet á la uniun daidé tla pert dl’organisaziun. A mez agost ti á dediche le museum MMM da Bornech n de ala cultura ladina, olache la ULVB á fat impara cun na letöra y discusciun dl poet Christian Ferdigg y cun n marcé di libri.
La pert dles publicaziuns dl’Uniun n’á nia sintí tan la burasca dl virus, ince deache bele da n valgügn agn se porta pro la majera pert di laurs sön na plataforma digitala, che alisirëia y fej gní asvelta la comunicaziun anter i grups de laur che ti stá do ai tröc proiec.
Ci che la Uniun Ladins Val Badia á ciamó döt fat, podëise lí t’La Usc di Ladins di 26 de forá.