La Usc di Ladins

Ara vá zoruch al 2015 l'acordanza danter le Minister dla Defenüda y la Provinzia de Südtirol por le renovamënt y la costruziun de frabicac nüs tl areal militar "Tempesti" da Corvara. I laurs á metü man dl 2021 y é gnüs stlüc jö chisc dis, sciöche an â preodü. Tl concret él gnü fat sö, sön na spersa de za. 11.200 m3 y por n cost de 6,6 miliuns de euro, n frabicat cun 52 posć da dormí, n frabicat cun n salf da mangé por 92 porsones, d'atri locai sciöche na infermaria, na lavandaria y na sënta cun danterlater i ofizi dl comando y n salf por les reuniuns. Lapró él ince gnü fat sö n garage che ti dá assosta ai mesi militars. Deplü les autorités, politiches y militares, che á tut pert ala inauguraziun. Danterlater ê presënc le comandant dles Trupes Alpines y General dl Corp d'Armada Ignazio Gamba, le Diretur di Laurs y dl Demane Giancarlo Gambardella, le direttur dl'Agenzia dl Demane regional Sebastian Caizza, le Diretur dla repartiziun provinziala ala mobilité Martin Vallazza, l'assessur provinzial Massimo Bessone, l'ombolt dl comun da Corvara Robert Rottonara y l'architët che ti é jü do ai laurs Claudio Lucchini. Do la pert ofiziala é la strotöra nöia gnüda benedida dal caplan militar. Les autorités á taié la vëta, denanco jí a vijité y a ti ciaré plü dampró ai frabicac nüs. 

Deplü podëise lí tla ediziun stampada dl vëndres ai 23 de dezëmber. 



 (kp)