Da chësc ejëmpl vëigon co che n video de püc secunc pó sfalzé na situaziun y forsc ince condüje a conclujiun massa asveltes. Sce les imajes vëgn spo amplificades sön i social, ésera fata. Insciö ésera stada pro n video che á fat la roda chisc dis. An vëiga n fat sozedü la domënia ai 5 de forá sön la pista "Bamby" tl’Alta Badia. Na ëra ê sön pista ia por tera, canche al vëgn docá na secunda porsona. Chësta ti refla ados deplëgn, se perd cinamai intrami i schi y corëta sotissura. Chësc é ci che an vëiga dal video. La ferida ia por tera s’á impó fat bindebó me: n brac rot y n trauma al ce; ara é porchël gnüda condüta te ospedal da Porsenú, da olache ara á podü gní fora n pêr de dis dedô.
Les
interpretaziuns che nia püces porsones á metü ite: l’ël che á raité sot s’un é sciampé, á lascé zoruch la ferida sön pista, zënza se cruzié sce ara â debojëgn de aiüt. En cört: omisciun de socurs, ci che foss n caje penal. Jüda ésera indere döt atramënter. Y sce la verité é gnüda fora, él mirit di Carabiniers da La Ila, che s’á ativé bele en chël de y á porté inant les inrescides. "Tres le video tut sö da turisć taliagn y tres i implanc de videosorvelianza, ésera garatada da ciafé fora le schiadú", dij le tenënt colonel di Carabiniers da Balsan Alessandro Coassin, y injunta: "i Carabiniers é stá bugn da rové pro i dac dl schipas y recostruí l’itinerar." Ala fin ésera gnüda fora che intrames les porsones che ê sön le video fajô pert dla medema comitiva y sojornâ ia en Gherdëna. "L’ël che â abiné la ëra ne s’un é nia sciampé, mo al s’á archité y é ince sté lapró", dij Coassin, che tol l’ocajiun por invié i schiadus da mëte averda sön pista, avëi n comportamënt respetus y responsabl, y dantadöt ince da ne sciampé nia sce al ess da sozede inzidënc, ajache cun i mesi d’aldedaincö, vara gonot da ciafé fora y rové al’identité.
(pablo)
